حقیقی آزادی لے کر رہیں گے۔ عمران خان کا آزادی مارچ کیلئے ویڈیو پیغام جاری

پشاور: چیئرمین تحریکِ انصاف اور سابق وزیر اعظم عمران خان نے آزادی مارچ کیلئے ویڈیو پیغام جاری کرتے ہوئے کہا ہے کہ ہم حقیقی آزادی لے کر رہیں گے، میں ولی انٹرچینج پہنچ رہا ہوں۔

تفصیلات کے مطابق سوشل میڈیا پر جاری کردہ ویڈیو پیغام میں سابق وزیر اعظم عمران خان نے کہا کہ میں اس وقت اپنے آزادی مارچ کا آغاز کررہا ہوں اور ولی انٹرچینج پہنچنے والا ہوں جہاں سے ہم اسلام آباد کی طرف روانہ ہوں گے۔

یہ بھی پڑھیں:

سیاسی طاقت کا اہم مظاہرہ، عمران خان آزادی مارچ کی قیادت کیلئے تیار

قوم خصوصاً خیبرپختونخوا کےعوام کے نام میراخصوصی پیغام! سب لوگ سیدھا ولی انٹرچینج پہنچیں جہاں سےایک بہت بڑےقافلے کی صورت میں اسلام آباد کیلئے
روانہ ہوں گے، انشاءاللہ#حقیقی_آزادی_مارچ pic.twitter.com/prdiTUdJUx

— Imran Khan (@ImranKhanPTI) May 25, 2022

سماجی رابطے کی ویب سائٹ ٹوئٹر پر پوسٹ کی گئی ویڈیو میں عمران خان نے کہا کہ میں ولی انٹرچینج سے آزادی مارچ کے کارواں کی قیادت کروں گا۔ مجھے امید ہے کہ سب نکلیں گے کیونکہ یہ ملکی تاریخ کا فیصلہ کن وقت ہے۔

خیال رہے کہ اس سے قبل چیئرمین تحریکِ انصاف نے آزادی مارچ کی قیادت کیلئے کمر کس لی، سابق وزیر اعظم عمران خان نے صوابی میں پی ٹی آئی کارکنان سے مختصر خطاب کا فیصلہ کیا۔

 سابق وزیر اعظم اور چیئرمین پی ٹی آئی عمران خان آج دوپہر 12 بجے پشاور سے صوابی کیلئے روانہ ہوں گے۔ عمران خان ہیلی کاپٹر کے ذریعے صوابی تک کا سفر کریں گے۔