اسلام آباد: صدرِ مملکت ڈاکٹر عارف علوی نے آج کورونا وائرس کی روک تھام کے پیشِ نظر جمعۃ المبارک کی نماز کی جگہ ظہر کی نماز گھر میں ادا کرنے کا فیصلہ کیا ہے۔
سماجی رابطے کی ویب سائٹ ٹوئٹر پر اپنے پیغام میں صدرِ مملکت ڈاکٹر عارف علوی نے کہا میں نے آج فیصلہ کیا ہے کہ جمعہ کی بجائے ظہر کی نماز اپنے گھر پر پڑھوں۔ اللہ تعالیٰ مجھے معاف فرمائے۔
صدرِ مملکت ڈاکٹر عارف علوی نے کہا کہ مجھے حضورِ اکرم ﷺ کی یہ حدیث اپنی طرف کھینچ رہی ہے جس میں انہوں نے فرمایا کہ بیمار افراد کو صحت مندوں کے ساتھ خلط ملط نہ کیا جائے۔
حدیث کا حوالہ دیتے ہوئے صدرِ مملکت نے کہا کہ جب مجھے یہ علم نہ ہو کہ کون صحت مند اور کون بیمار ہے تو میں دوسروں کو اپنے انفیکشن سے بچانا چاہتا ہوں۔
I decided to perform Zohar in my house today instead of Juma. May Allah forgive me. I am attracted to Hadith of the Prophet ﷺ who said ‘Sick should not be mixed with healthy' and when I don't know who is sick and who is healthy, I save others from my infection too.
استغفراللہ— Dr. Arif Alvi (@ArifAlvi) March 20, 2020
یاد رہے کہ اس سے قبل صدرِ مملکت ڈاکٹر عارف علوی نے کورونا وائرس کے حوالے سے تمام سیاسی پارٹیوں سے اختلافی معاملات پر سیاسی بحث میں کمی لانے پر تشکر کا اظہار کیا۔
ٹوئٹر پر اپنے پیغام میں صدرِ مملکت ڈاکٹر عارف علوی نے کہا کہ میں اختلافی سیاسی بحث کم کرنے اور کورونا وائرس کے خلاف جنگ میں اتحاد کیلئے اقدامات پر تمام پارٹیوں کا شکریہ ادا کرتا ہوں۔
مزید پڑھیں: صدرِ مملکت کا اختلافی سیاسی بحث میں کمی پر اظہارِ تشکر