موجودہ حکومت سب سے کرپٹ، چیئرمین نیب استعفیٰ دیں اور گھر جائیں، بلاول بھٹو

لاہور :پاکستان پیپلز پارٹی کے چیئرمین بلاول بھٹو زرداری نے کہا ہے کہ غیر تربیت یافتہ اورنااہل افراد ملک کے سب سے بڑے صوبے کی حکومت چلارہے ہیں، موجودہ حکومت سب سے زیادہ کرپٹ حکومت ہے لیکن نیب حکومت کے کیسز چھوڑ کر اپوزیشن جماعتوں سے سیاسی انتقام لینے میں مصروف ہے۔

بلاول بھٹو نے لاہور میں پریس کانفرنس سے خطاب کے دوران حکومت پربھر پور تنقید کرتے ہوئے کہا کہ پی پی پی کے چیئرمین نے یہ بھی دعویٰ کیا کہ ٹرانسپیرنسی کے مطابق بین الاقوامی موجودہ حکومت تاریخ میں سب سے زیادہ کرپٹ حکومت ہے۔

بلاول بھٹو نے قومی احتساب بیورو کے خاتمے ، چیئرمین کے استعفے اور سپریم کورٹ آف پاکستان کے حالیہ فیصلے کے بعد تمام سیاسی قیدیوں کی رہائی کا مطالبہ کرتے ہوئے کہا کہ عدالت کے فیصلے میں واضح طور پر کہا گیا ہے کہ نیب کو پولیٹیکل انجینئرنگ کے لئے استعمال کیا جارہا ہے۔ انہوں نے یہ بھی الزام لگایا کہ نیب نے حکومت کے کیسز کی نظر انداز کرکے صرف اپوزیشن کے خلاف کارروائی کی ہے۔

انہوں نے نیب کے خاتمے کے لئے تمام اسٹیک ہولڈرز کو اکٹھا ہونے کی بھی تاکید کی اور کہا کہ ملک میں احتساب کے غیر جانبدارانہ عمل کے لئے متفقہ قانون سازی کی ضرورت ہے۔

یہ بھی پڑھیں:مشیرِ خزانہ ڈاکٹر عبدالحفیظ شیخ کو نیشنل فنانس کمیشن سے برطرف کردیا گیا

اپوزیشن کی آل پارٹیز کانفرنس کے بارے میں بات کرتے ہوئے بلاول بھٹو نے کہا کہ انہوں نے پاکستان مسلم لیگ (ن) سے تفصیلی بات چیت کی ہے اور اپوزیشن لیڈر شہباز شریف کی مکمل بازیابی کے بعد کانفرنس کا انعقاد کرنے کا فیصلہ کیا گیا ہے۔