اسلام آباد:وفاقی وزیرتعلیم شفقت محمود نے کہا ہے کہ ملک میں آئندہ مکمل نصاب پڑھایا جائے گا اوراسکے مطابق امتحانات لئے جائیں گے،م ختلف صوبوں نے دسویں اور بارہویں جماعت کے طلبہ کی پروموشن پالیسی کا مختلف فارمولا طے کیا ہے، ایک یونیفارم پروموشن پالیسی بنائی جائے،اختیاری مضامین کے مارکس کاؤنٹ کئے جائیں۔
جاری اعلامیہ کے مطابق وفاقی وزیر تعلیم، پیشہ وارانہ تربیت و قومی ورثہ شفقت محمود کی زیر صدارت32ویں بین الصوبائی وزرا تعلیم کانفرنس کا اجلاس منعقد ہوا۔ اجلاس میں تمام صوبائی وزرا تعلیم و متعلقہ سیکریٹریز نے شرکت کی۔ ایگزیکٹو ڈائریکٹر ایچ ای سی، ڈی جی ایف جی ای آئی، چیئر مین آئی بی سی سی، ایم ڈی پنجاب ٹیکسٹ بک بورڈ، چیئر مین فیڈرل بورڈ اور دیگر اعلی عہدیداروں نے بھی اجلاس میں شرکت کی۔
وفاقی وزیر تعلیم شفقت محمود نے کہا کہ مختلف صوبوں نے دسویں اور بارہویں جماعت کے طلبہ کی پروموشن پالیسی کا مختلف فارمولا طے کیا ہے جس کی وجہ سے پروموشن پالیسی میں تفریق آ رہی ہے لہٰذا بین الصوبائی وزرا ء تعلیم نے اس بات پر اتفاق کیا کہ ایک یونیفارم پروموشن پالیسی بنائی جائے اور متفقہ طور پر یہ فیصلہ کیا گیا کہ اختیاری مضامین کے مارکس کاؤنٹ کئے جائیں اور کورونا کی وباء کی وجہ سے اسکولوں کی بندش کو مدنظر رکھتے ہوئے طلبہ کو سہولت دینے کیلئے فیصلہ کیا گیا کہ جس مضمون میں طلبہ فیل ہوں ان میں 33 فیصد نمبرز دیئے جائیں اور اس طرح ایوریج مارکس نکالے جائیں گے جبکہ لازمی مضامین میں 5فیصد اضافی نمبرز دیئے جائیں گے۔
مزید پڑھیں:حکومت کا ویکسین نہ لگوانے والے شہریوں پر سخت پابندیوں کا اعلان