گوگل نیوز پر ہمیں فالو کریںاسلام آباد: وزیرِ اعظم پاکستان عمران خان نے کراچی میں بارش کے بعد کی صورتحال کا نوٹس لیتے ہوئے نیشنل ڈیزاسٹر مینجمنٹ اتھارٹی (این ڈی ایم اے) کوکراچی میں صفائی کا کام شروع کرنے کی ہدایت دی ہے۔
سماجی رابطے کی ویب سائٹ ٹوئٹر پر اپنے پیغام میں وزیرِ اعظم عمران خان نے کہا کہ میں نے نیشنل ڈیزاسٹر مینجمنٹ اتھارٹی (این ڈی ایم اے) کے چیئرمین کو فوری طور پر کراچی جانے اور بارش کے بعد صفائی کا کام شروع کرنے کی ہدایات دی ہیں۔
وزیرِ اعظم عمران خان نے کہا کہ میں نے افواجِ پاکستان کو بھی شہر کی صفائی کے کام میں ہاتھ بٹانے کا کہا ہے تاکہ کراچی میں بارش کے بعد پیدا ہونے والی صورتحال پر قابو پایا جاسکے۔
میں نے نیشنل ڈیزاسٹر مینجمنٹ اتھارٹی (این ڈی ایم اے) کے چیئرمین کو فوری طور پر کراچی جانے اور بارش کے بعد صفائی کا کام شروع کرنے کی ہدایات دی ہیں اور افواج پاکستان کو بھی شہر کی صفائی کے کام میں ہاتھ بٹانے کا کہا ہے۔
— Imran Khan (@ImranKhanPTI) July 29, 2020
یاد رہے کہ اِس سے قبل وزیر اعظم عمران خان کی گورنر سندھ عمران اسماعیل سے وزیر اعظم ہاؤس میں ملاقات ہوئی۔ وزیراعظم عمران خان نے کراچی میں حالیہ بارشوں کے پیش نظر نیشنل ڈیزاسٹر مینجمنٹ اتھارٹی کو برساتی نالوں کی صورتحال کے بارے میں تفصیلی جائزہ رپورٹ پیش کرنے کی ہدایت کی۔
گزشتہ روز وزیر اعظم عمران خان کا کہنا تھا کہ وفاقی حکومت کراچی کے عوام کو اس مشکل صورتحال میں تنہا نہیں چھوڑے گی۔ ملاقات میں وزیر برائے سائنس و ٹیکنالوجی چوہدری فواد حسین بھی شریک تھے۔
مزید پڑھیں: کراچی کو مشکل میں تنہا نہیں چھوڑیں گے، وزیر اعظم
