گوگل نیوز پر ہمیں فالو کریںمصر کے دار الحکومت قاہرہ کے قدیم محلے المطریہ میں مشرق وسطی کے طویل ترین عوامی دستر خوان کا اہتمام کیا گیا۔
عالم عرب کی معروف نیوز ویب سائٹ سبق کے مطابق اہل محلہ کی ذاتی کوشش سے عوام الناس کے علاوہ سیاحوں کی بڑی تعداد اس دستر خوان میں شرکت کرنے آتی ہے جہاں جشن کا سماں ہوتا ہے۔
یہ دستر خوان اس قدر مشہور ہوگیا ہے کہ ہر سال قاہرہ بھر سے لوگ اس میں شرکت کرنے آتے ہیں۔
امسال 750 میٹر طویل دستر خوان بچھایا گیا جس میں میڈیا نمائندوں کے علاوہ سوشل میڈیا ایکٹوسٹس کی بڑی تعداد نے شرکت کی۔
یہ دسترخوان کیسے سجتا ہے؟
طریقہ یہ ہے کہ دستر خوان جن گھروں کے سامنے سے گزرتا ہے ان گھروں کے رہنے والے اسے انواع و اقسام کے کھانوں سے سجانے کا اہتمام کرتے ہیں۔
واضح رہے کہ المطریہ قاہرہ کا قدیم ترین محلہ ہے جہاں فرعونی، قبطی اور اسلامی آثار موجود ہیں۔
گزشتہ 10 سال سے ہر 15 ویں رمضان کو یہاں عوامی دستر خوان کا اہتمام ہوتا ہے جو آہستہ آہستہ قومی تہوار بنتا جارہا ہے۔
امسال عوامی دستر خوان میں کم و بیش 10 ہزار افراد نے شرکت کی ہے۔
بتایا جاتا ہے کہ 2013 میں محلے کے 5 لڑکوں نے عوامی دستر خوان شروع کیا تھا جسے اہل محلہ نے بے حد پسند کیا اور ہر سال دستر خوان کی لمبائی میں اضافہ ہوتا گیا۔
