گوگل نیوز پر ہمیں فالو کریںاسلام آباد: وفاقی وزیرِ اطلاعات شبلی فراز نے کہا ہے کہ آج عالمی دن کے موقعے پر عالمی برادری اور انسانی حقوق کے علمبرداروں کو مقبوضہ کشمیر میں بھارتی فوج کے بد ترین مظالم کا نوٹس لینا ہوگا۔
سماجی رابطے کی ویب سائٹ ٹوئٹر پر اپنے پیغام میں وزیرِ اطلاعات شبلی فراز نے کہا کہ آج دنیا بھر میں انسانی حقوق کا عالمی دن مناتے ہوئے اس کے علمبرداروں کو وادئ جنت نظیر میں بے گناہ انسانوں سے روا رکھے جانے والے بد ترین مظالم اور بنیادی انسانی حقوق کی سنگین ترین پامالیوں کا نوٹس لینا چاہئے۔
پیغام میں وزیرِ اطلاعات شبلی فراز نے کہا کہ نہ صرف مقبوضہ کشمیر میں مظالم کا نوٹس لیا جائے بلکہ بھارت اور قابض بھارتی فوج کو کٹہرے میں کھڑا کرنے کیلئے عالمی برادری کو عملی اقدامات بھی اٹھانا ہوں گے جبکہ مقبوضہ کشمیر گزشتہ برس 5 اگست سے دنیا کی سب سے بڑی جیل کا منظر پیش کر رہا ہے۔
وفاقی وزیر شبلی فراز نے کہا کہ مقبوضہ کشمیر کے مظلوم عوام، خواتین، بچے اور بزرگ اپنے ہی گھروں میں قید کر دئیے گئے ہیں، جنت نظیر وادئ کشمیر پر مواصلاتی بلیک آؤٹ اورسخت ترین پابندیاں عائد ہیں۔ انسانیت کے خلاف بھارتی جرائم رُکوا کر اور کشمیریوں کے حقوق کا تحفظ کرکے ہی عالمی یومِ انسانی حقوق کی ساکھ بڑھائی جاسکتی ہے۔
مقبوضہ جموں کشمیر 5اگست 2019 سے دنیا کی سب سے بڑی جیل کا منظر پیش کر رہا ہے۔ خواتین‘بچے‘بزرگ اپنے ہی گھروں میں قید ہیں۔کمیونیکیشن بلیک آؤٹ اورسخت ترین قدغنیں عائد ہیں۔انسانیت کےخلاف بھارتی جرائم رکواکر اورکشمیریوں کے بنیادی حقوق کے تحفظ سے ہی اس دن کی عالمی ساکھ بڑھائی جاسکتی ہے۔
— Senator Shibli Faraz (@shiblifaraz) December 10, 2020
یاد رہے کہ وطنِ عزیز پاکستان سمیت دنیا بھر میں انسانی حقوق کا عالمی دن آج منایا جارہا ہے جو ہر سال اقوامِ متحدہ کے تحت 10 دسمبر کے روز منایا جاتا ہے۔
انسانی حقوق کا عالمی دن منانے کا مقصد دنیا کے ہر امیر و غریب، کالے گورے اور کمتر و برتر انسان کو مساوی حقوق دینے سے متعلق شعور و آگہی کو اجاگر کرنا ہے۔
مزید پڑھیں: دُنیا بھر میں انسانی حقوق کا عالمی دن آج منایا جارہا ہے
