گوگل نیوز پر ہمیں فالو کریںسیہون:وزیراعلیٰ سندھ مراد علی شاہ کا کہنا ہے کہ اپوزیشن جماعتوں کو ایک مرتبہ پھر سے متحد ہونے کی ضرورت ہے، انہوں نے کہا کہ سندھ میں بلدیاتی انتخابات سیاسی جماعتوں کی بنیاد پر عام انتخابات سے قبل ہوں گے۔
میڈیا سے گفتگو میں وزیراعلی سندھ مراد علی شاہ نے کہا کہ سندھ میں بلدیاتی انتخابات سیاسی جماعتوں کی بنیادوں پر عام انتخابات سے قبل ہوں گے،انتخابات ایسے کرائیں گے جس پر کسی کو اعتراض نہ ہو۔
انہوں نے کہا کہ مردم شماری پر اعتراضات ہیں جس کے ثبوت مشترکہ مفادات کونسل میں پیش کیے ہیں،آئینی حق استعمال کرتے ہوئے پارلیمنٹ کا مشترکہ اجلاس طلب کرکے بحث کرانے کے لیے خط بھی تحریر کیا ہے۔
وزیراعلیٰ سندھ نے کہا کہ ہماری خارجہ پالیسی ناکام جارہی ہے، ایران، افغانستان اور چین سے ہمارے رابطے متاثر ہورہے ہیں تاہم ہم چین سے اچھے رابطوں کی کوشش میں ہیں۔
مراد علی شاہ نے کہا کہ پی ڈی ایم میں شامل جماعتوں کو چاہیے کہ اپوزیشن کو متحد کریں، بلاول بھٹو زرداری نے اے پی سی بلائی جس کے بعد پی ڈی ایم کی تشکیل ہوئی۔
پی ڈی ایم بنانے کا مقصد عمران حکومت سے نجات تھا مگر کچھ لوگوں نے بلاول بھٹو سے استعفیٰ مانگ لیا، وفاقی حکومت نے مہنگائی کا طوفان برپا کیاہے تاہم اپوزیشن جماعتوں کو ایک مرتبہ پھر سے متحد ہونے کی ضرورت ہے۔
مزید پڑھیں: کشمیر سے آج بھٹو اور ن لیگ کا نام ختم ہو جائے گا، حلیم عادل شیخ
