پی ٹی آئی رہنما شیریں مزاری کو اینٹی کرپشن نے گرفتار کرلیا

لاہور: اینٹی کرپشن لاہور نے پاکستان تحریک انصاف کی رہنما شیریں مزاری کو گرفتار کرلیا ہے۔

تفصیلات کے مطابق شیریں مزاری کو ان کے گھر کے باہر سے گرفتار کیا گیا، ذرائع کا کہنا ہے کہ اینٹی کرپشن لاہور نے انہیں گرفتار کر کے تھانہ مارگلہ منتقل کردیا، تھانہ مارگلہ سے انہیں لاہور منتقل کیا جارہا ہے۔

ذرائع کے مطابق اینٹی کرپشن پنجاب کی ٹیم انہیں گرفتار کرنے اسلام آباد پہنچی تھی۔ اسلام آباد پولیس نے بھی اینٹی کرپشن ڈیپارٹمنٹ پنجاب کی جانب سے  شیری مزاری کی گرفتاری کی تصدیق کی ہے۔

سماجی رابطے کی ویب سائٹ ٹوئٹر پر پی ٹی آئی رہنما اور سابق وفاقی وزیر اطلاعات فواد چودھری نے لکھا کہ اطلاعات ہیں کہ شیری مزاری کو اسلام آباد میں ان کے گھر کے باہر سے گرفتار کر لیا گیا ہے۔

اطلاعات ہیں کہ @ShireenMazari1 کو ان کے اسلام آباد گھر کے باہر سے گرفتار کر لیا گیا ہے

— Ch Fawad Hussain (@fawadchaudhry) May 21, 2022

 پی ٹی آئی کے رہنما افتخار درانی نے سوشل میڈیا پر بیان جاری کرتے ہوئے کہا ہے کہ شیریں مزاری کو کچھ دیر قبل ان کی رہائشگاہ کے باہر سے اٹھا لیا گیا ہے۔ انہوں نے تمام کارکنان کو تھانہ کوہسار کے باہر پہنچنے کی ہدایت کی ہے۔

Dr @ShireenMazari1 has been picked up outside from her house a while ago, everyone must reach Police Station Kohsaaar!

#امپورٹڈ__حکومت___نامنظور

— Iftikhar Durrani (@DuraniIftikhar) May 21, 2022

ذرائع کا کہنا ہے کہ پی ٹی آئی رہنما شیریں مزاری کیخلاف ڈی جی خان میں کرپشن کی تحقیقات جاری ہے، انھیں کچھ دیر میں اسلام آباد کی مقامی عدالت سے راہداری ریمانڈ حاصل کرنے کے بعد ڈی جی خان منتقل کیا جائیگا۔

شیریں مزاری کی بیٹی ایمان مزاری کا کہنا ہے کہ مرد پولیس اہلکار میری ماں پر تشدد کرتے ہوئے انہیں گھسیٹے ہوئے لے گئے اور مجھے صرف اتنا بتایا گیا ہے کہ اینٹی کرپشن ونگ لاہور لے جایا جارہا ہے۔