اسلام آباد: صدرِ مملکت ڈاکٹر عارف علوی نے زینب الرٹ بل کے مسوّدے پر دستخط کر دئیے ہیں جس کے بعد زینب الرٹ بل کو قانون کی حیثیت حاصل ہو گئی ہے۔
سماجی رابطے کی ویب سائٹ ٹوئٹر پر اپنے پیغام میں صدرِ مملکت ڈاکٹر عارف علوی نے بتایا کہ زینب الرٹ بل پر دستخط کرکے اسے قانون کی حیثیت دے دی گئی ہے جبکہ یہ ایک بہترین قانون ہوگا۔
پیغام میں صدرِ مملکت نے کہا کہ بچوں کے اغوا کے مقدمات میں زینب الرٹ بل ایک عمدہ قانون ہے جو تیز ردِ عمل اور بازیابی کے حوالے سے اہم کردار ادا کرے گا۔
صدرِ مملکت ڈاکٹر عارف علوی نے کہا کہ بل کے تحت ملک میں مفت ہیلپ لائنز قائم کی جائیں گی اور پولیس و انتظامیہ کے تیز رفتار ردِ عمل کے لیے فریم ورک بھی تشکیل دیا جائے گا۔
انہوں نے کہا کہ زینب الرٹ بل اِس حوالے سے بھی اہم ہے کہ اِس کے تحت مجرموں کا سراغ لگانے کے لیے ٹیکنالوجی کا استعمال کیا جائے گا جبکہ ٹیکنالوجی کے ذریعے ہی طریقہ کار میں مزید بہتری لائی جائے گی۔
I have just signed the Zainab Alert Bill into law. An excellent law for rapid response & recovery in cases of child kidnappings. It will establish toll free helplines, lay down framework for quick police & admin response. It will use & improve upon technology to trace criminals.
— The President of Pakistan (@PresOfPakistan) March 19, 2020
یاد رہے کہ اِس سے قبل انسپکٹر جنرل پولیس سندھ مشتاق احمد مہر نے سینٹرل پولیس آفس کراچی میں ’اسٹیٹ آف دی آرٹ زینب الرٹ موبائل ایپ‘ کا باقاعدہ آغاز کیا۔
اس سلسلے میں سی پی او میں 10 روز قبل ایک شاندار تقریب ہوئی جس میں تمام متعلقہ محکموں کے اعلیٰ عہدیداروں ، سول سوسائٹی کے ممبران ، افسران ، سندھ پولیس اور رضاکاروں کے ساتھ سی پی ایل سی کے مہمانوں کو مدعوکیا گیا۔
مزید پڑھیں: ’اسٹیٹ آف دی آرٹ زینب الرٹ ایپ‘ کا کراچی میں باقاعدہ آغاز