گوگل نیوز پر ہمیں فالو کریںلاہور:پاکستانی وکٹ کیپر بیٹر محمد رضوان نے بھارتی کرکٹ ٹیم کے سابق کپتان ویرات کوہلی کی خراب فارم پر تبصرہ کرتے ہوئے کہا ہے کہ میں صرف ان کیلئے دعا ہی کر سکتا ہوں۔
ویرات کوہلی اس وقت اپنے کیریئر کی بدترین فارم میں ہیں، وہ پچھلے دو سے ڈھائی سال کے دوران کسی بھی فارمیٹ میں بمشکل ہی کوئی سنچری بناسکے ہیں،کوہلی کی فارم کو لے کر ان کے مداح پریشان اور ناقدین انہیں تنقید کا نشانہ بنارہے ہیں۔
محمد رضوان نے بھی اس پر تبصرہ کیا ہے اور امید ظاہر کی ہے کہ ویرات اپنی فارم کو دوبارہ حاصل کرلیں گے۔ اپنے انٹرویو کے دوران محمد رضوان نے کہا کہ میں یہ کہوں گا کہ ویرات کوہلی ایک چیمپئن کھلاڑی ہیں لیکن اس وقت ہم ان کیلئے دعا ہی کرسکتے ہیں کیونکہ وہ ایک محنتی کھلاڑی ہیں۔
انہوں نے کہا کہ ہر کھلاڑی سنچری اسکور کرتا ہے اور پھر مسلسل صفر پر بھی آؤٹ ہوتا ہے، یہ سب اسی طرح چلتا رہتا ہے۔ رضوان کے مطابق میں ان کے لیے صرف دعا ہی کرسکتا ہوں اور پْرامید ہوں کہ وہ اپنی محنت کے ذریعے ان تمام چیزوں پر قابو پالیں گے۔
خیال رہے کہ ویرات کوہلی نے بھارت کی ٹیسٹ اور ٹی ٹوئنٹی کپتانی چھوڑی تاہم اس کے بعد انہیں ون ڈے فارمیٹ کی کپتانی سے بھی محروم کردیا گیا،ان کے برے وقت پر محمد رضوان کا کہنا تھا کہ مشکل وقت آتے ہیں اور چیزیں آسان بھی ہوجاتی ہیں۔
مزید پڑھیں:ویسٹ انڈیز سیریز سے قبل شاہین آفریدی نے کاؤنٹی چیمپئن شپ چھوڑ دی
