کراچی: نکائی کے سی ای او صادق محمدنے کہا ہے کہ کورونا وائرس سے بچاؤ کیلئے لوگوں کو سماجی فاصلے کی ترغیب دی جائے بصورت دیگر کورونا تباہی مچا کر رکھ دے گا، فرض نمازوں میں سماجی فاصلے کے ساتھ جمعتہ المبارک کے کم ازکم دو اجتماعات منعقد کیے جائیں۔
نارتھ کراچی انڈسٹریل ڈیولپمنٹ اینڈ مینجمنٹ کمپنی کے چیف ایگزیکٹیو آفیسر صادق محمد نے کورونا وائرس کے مہلک مرض کی موجودگی میں عوام الناس کی جانب سے سماجی فاصلے کی پابندی نہ کرنے اور ایس او پیز کی خلاف ورزی پر گہری تشویش کا اظہار کرتے ہوئے قیمتی انسانی جانوں کے لیے انتہائی خطرناک قرار دیا ہے۔
ایک بیان میں انہوں نے کہاکہ کاروباری و تجارتی مراکز ہوں یا مساجد کہیں بھی ایس اوپیز پر حقیقی معنوں میں عمل درآمد ہوتا نظر نہیں آرہا جس سے یہ وبا پھیلنے سے زیادہ خدشات ہیں۔
انہوں نے کہاکہ کورونا کی وجہ سے ملکی معیشت شدید بحرانوں سے دوچار ہے لہٰذا حکومت کو کورونا سے بچاؤ کی احتیاطی تدابیر پر سختی سے عمل درآمد یقینی بنانے اور سماجی فاصلے کو برقرار رکھنے کی ترغیب دینے کی ضرورت ہے کیونکہ لوگوں کے درمیان سماجی فاصلہ ہی اس مہلک وبا سے بچاؤ کا واحد حل ہے۔
انہوں نے تجویز دی کہ مساجد میں نماز کے دوران سماجی فاصلے پر سختی سے عمل دآمد کروایا جائے تاکہ لوگ بلا رکاوٹ باجماعت نماز کی ادائیگی کا شرف حاصل کرسکیں۔
مزید پڑھیں: پاکستان میں کورونا سے مزید 78 اموات، کیسز 66ہزار457 تک پہنچ گئے