ق لیگ کی قیادت کا پنجاب میں تبدیلی کے لئے نواز شریف سے رابطہ

اسلام آباد: پنجاب کی سیاست میں ایک نئی پیش رفت سامنے آئی ہے، مسلم لیگ (ق) کی قیادت نے لندن میں پاکستان مسلم لیگ ن کے صدر نواز شریف سے رابطہ کیا ہے۔

ایک نجی ٹی وی چینل کی خبر کے مطابق پاکستان مسلم لیگ ن کے اندر موجود ذرائع نے تصدیق کی ہے کہ ق لیگ کی قیادت نے کہا کہ وزیراعلیٰ پنجاب بے حس اور بے اختیار ہیں۔

انہوں نے کہا کہ ہم سے غلطیاں ہوئیں کیونکہ ہم نے چوہدری شجاعت حسین کی تجاویز پر عمل نہیں کیا۔

نجی ٹی وی چینل کی خبر کے مطابق ق لیگ کے رہنما نے کہا کہ پی ٹی آئی کی پنجاب کی قیادت رکاوٹیں کھڑی کر رہی ہے اور انہیں پیشہ ورانہ اور آئینی طور پر کام نہیں کرنے دیتی۔انہوں نے کہا کہ قانونی اور آئینی مطالبات ہیں، جنہیں عمران خان نظر انداز کر رہے ہیں۔

واضح رہے کہ چوہدری پرویز الٰہی پنجاب اسمبلی میں پی ٹی آئی کے اکثریتی ووٹوں کی بنیاد پر صوبہ پنجاب کے وزیراعلیٰ بنے ہیں۔

واضح رہے کہ ایک روز قبل یہ خبر سامنے آئی تھی کہ پنجاب میں مسلم لیگ (ق) کے پچاس فیصد یا اس سے زائد ارکان اسمبلی پارٹی صدر چوہدری شجاعت سے رابطے میں ہیں۔

باخبر ذرائع کے مطابق اگرچہ وفاقی حکومت جان لیوا سیلاب سے نمٹنے میں مصروف ہے لیکن وہ پنجاب حکومت کو گرانے پر بھی غور کر رہی ہے۔

مزید پڑھیں:ہم قائد اعظم محمد علی جناح کی فلاسفی پر عمل پیرا ہیں، آصف علی زرداری

ذرائع نے دعویٰ کیا کہ پارٹی کے زیادہ تر قانون ساز چوہدری شجاعت کے فیصلوں کی حمایت کرنے پر راضی ہو گئے ہیں – جس سے پی ٹی آئی کو ایک بار پھر پنجاب حکومت کھونے کا خطرہ ہے۔