وزیر اعظم پاکستان عمران خان نے کہا ہے کہ بارش اور بدلتے موسم سے پریشان شرکائے آزادی مارچ کے لیے حکومت نے سی ڈی اے (کیپٹل ڈویلپمنٹ اتھارٹی) کو ہدایات جاری کردی ہیں۔
سماجی رابطے کی ویب سائٹ ٹوئٹر پر وزیر اعظم عمران خان نے اپنے پیغام میں کہا کہ میں نے آزادی مارچ شرکاء کو ممکنہ امداد کی فراہمی کا اندازہ لگانے کے لیے سی ڈی اے سربراہ کو بھیج دیا ہے۔
وزیراعظم عمران خان نے کہا کہ چیئرمین سی ڈی اے کو میں نے دھرنے کے مقام پر جانے کا حکم دیا ہے تاکہ یہ اندازہ لگایا جاسکے کہ بارش کے حوالے سے حکومت مخالف مارچ کے شرکاء کو کیا امداد فراہم کی جاسکتی ہے۔
میں نے یہ اندازہ لگانے کیلئے کہ بارش اور بدلتے موسم کے حوالے سے شرکاء کو کیا امداد فراہم کی جاسکتی ہے، چیئرمین سی ڈی اے کو فوری طور پر دھرنے کے مقام پر جانے کا حکم دیا ہے۔
— Imran Khan (@ImranKhanPTI) November 6, 2019
یاد رہے کہ اس سے قبل وفاقی دارالحکومت اسلام آباد میں تیز ہوائیں چلنے کے ساتھ ساتھ بارش بھی شروع ہو گئی جس نے حکومت مخالف آزادی مارچ میں شریک افراد کے لیے شدید مشکلات پیدا کردیں ۔
اسلام آباد میں موسلا دھار بارش اور ہواؤں کے ساتھ ساتھ درجہ حرارت میں کمی کے باعث سردی بڑھ چکی ہے جو کھلے آسمان تلے رات گزارنے پر مجبور شرکائے آزادی مارچ کے لیے ناقابلِ برداشت ہوچکی ہے۔
مزید پڑھیں: حکومت مخالف آزادی مارچ کے دوران اسلام آباد میں تیز ہوائیں اور بارش