گوگل نیوز پر ہمیں فالو کریںحالیہ دنوں میں پاکستان کو ایک ایسے نازک مسئلے کا سامنا ہے جو عوامی تحفظ کے نقطہ نظر سے انتہائی اہمیت کا حامل ہے۔
ہم دیکھ رہے ہیں کہ نقل و حمل اور استعمال دونوں کے دوران ایل پی جی سلنڈر کے دھماکوں کے واقعات میں نمایاں اضافہ ہو گیا ہے جس کے نتیجے میں متعدد جانی نقصانات رپورٹ ہوئے ہیں۔
اس مسئلے کی بنیادی وجہ دراصل ایل پی جی سلنڈروں کی تیاری میں غیر معیاری مینوفیکچرنگ طریقوں اور غیرمناسب مواد کا استعمال ہے۔ مسئلہ یہ ہے کہ غیر لائسنس یافتہ مینوفیکچررز کم پیسوں میں زیادہ منافع کھینچنے کے چکر میں حفاظتی معیارات کو نظر انداز کرتے ہوئے مارکیٹ کو غیر معیاری سلنڈروں سے بھر رہے ہیں، جس سے صارفین کی زندگیاں خطرے میں پڑ گئی ہیں۔
صنعت کی نگرانی کے لیے اوگرا جیسی ریگولیٹری اتھارٹیز کی کوششوں کے باوجود ایسا لگتا ہے کہ قوانین کے نفاذ کے عمل میں خامیاں ہیں، جس کی وجہ سے غیر مجاز مینوفیکچررز کو کھلی چھوٹ ملی ہوئی ہے۔
یہ نہایت اہمیت کا حامل مسئلہ ہے، اسے حل کرنے کے لیے ریگولیٹری اصلاحات پر توجہ دینے کی ضرورت ہے، تاکہ کوالٹی کنٹرول کے اقدامات کو سخت کردیا جائے اور غیر قانونی مینوفیکچرنگ آپریشنز کے خلاف کریک ڈاؤن یقینی بنایا جاسکے۔
مزید برآں اس حوالے سے ٹریک اینڈ ٹریس سسٹم جیسی جدید ٹیکنالوجیز کو اپنانے کی بھی ضرورت ہے، اس سے اس مسئلے کو کافی حد تک کم کیا جا سکتا ہے۔
ایل پی جی سلنڈر سے جڑے عوامی حفاظت کے مسئلے کو حل کرنے کے لیے تمام متعلقہ اسٹیک ہولڈرز کی جانب سے مربوط نقطہ نظر کی اشد ضرورت ہے۔ سلنڈر کے دھماکوں کی بنیادی وجوہات کو ایڈریس کرنے اور حفاظتی معیارات کو سخت کرنے کے لیے فعال اقدامات بروئے کار لانا انتہائی ضروری ہے۔
اس طرح کے مربوط اقدامات اور مسلسل نگرانی کے ذریعے ہی ایل پی جی سلنڈر کے استعمال سے منسلک خطرات اور انسانی جانوں کے ضیاع کو کم کیا جاسکتا ہے۔
