گوگل نیوز پر ہمیں فالو کریںقطر میں جاری فیفا ورلڈکپ میں مراکش کی شاندار کارگردگی نے دنیا کو حیران کردیا ہے۔
مراکش پہلا افریقی اور دوسرا مسلم ملک ہے جس نے سیمی فائنل کیلے کوالیفائی کیا ہے یہی وجہ ہے اسے مسلم ممالک کی بھرپور حمایت حاصل ہے لیکن ایک مسلم ملک ایسا بھی ہے جو اُس کی کارگردگی سے خوش نہیں ہے، وہ نام مراکش کے پڑوسی ملک الجیریا کا ہے۔
الجیریا کا طویل عرصے سے مراکش کے ساتھ جھگڑا چل رہا ہے، جس کا اندازہ اس بات سے لگایا جاسکتا ہے کہ جب مراکش نے پرتگال کے خلاف فتح حاصل کی تو الجیریا کے سرکاری میڈیا نے مراکش کی فتح کی خبر چلانے کے بجائے مراکش کی حکومت مخالف مظاہروں پر پرائم ٹائم رپورٹس چلائیں۔
سیمی فائنل میں مراکش کی رسائی پر مصر اور سعودی عرب نے اُسے مبارکباد دی لیکن الجیریا کی جانب سے ایسی کوئی خبر موصول نہیں ہوئی۔
اس پورے ٹورنامنٹ کے دوران الجیریا کے سرکاری میڈیا نے مراکش کے بجائے سب ٹیموں کے حوالے سے خبریں دیں اس کا اندازہ اس بات سے لگایا جاسکتا ہے کہ جب مراکش نے پینالٹیز پر اسپین کو ناک آؤٹ کیا تو الجیریا کے سرکاری میڈیا نے مراکش کا حوالہ دیے بغیر یہ خبر چلائی کے ایک ٹیم نے اسپین کو شکست دیدی۔
خیال رہے کہ آج رات 12 بجے مراکش سیمی فائنل میں دفاعی چیمپئن فرانس کا سامنا کرے گا اور اگر اس نے فتح حاصل کرلی تو وہ فائنل میں رسائی کرنے والا پہلا مسلم ملک ہوگا ۔
