معروف مزاحیہ ڈرامہ نادانیاں فنکار جوڑی ندا یاسر اور یاسر نواز کے علاوہ دانش نواز کے جھگڑوں کی نذر ہوگیا ہے جس کا اعتراف فنکار جوڑی نے ایک شو کے دوران کیا۔
تفصیلات کے مطابق ندا یاسر اور یاسر نواز ایک ٹی وی شو میں جلوہ گر ہوئے اور نادانیاں سمیت دیگر مختلف موضوعات پر ہلکے پھلکے اور شگفتہ انداز میں دلچسپ گفتگو کی۔
ٹی وی شو کے دوران نیند میں چلنے سے لے کر ایک لاپ ٹاپ کو توڑ بیٹھنے تک فلم ساز یاسر ناز اور مارننگ شو کی میزبان و اداکارہ ندا یاسر نے اپنی زندگی کے متعلق مختلف انکشافات کیے۔
حال ہی میں ندا یاسر اور یاسر نواز نے اپنی شادی کی 20ویں سالگرہ منائی ہے۔ احسن خان کے ہمراہ ٹائم آؤٹ نامی ٹی وی شو میں گفتگو کرتے ہوئے فنکار جوڑی نے مندرجہ ذیل انکشافات کیے۔
یاسر نواز کو اپنے باتھ روم کا دروازہ لاک کرنے کی اجازت نہیں تھی۔ نادانیاں یاسر کا پہلا کامیڈی ڈرامہ تھا جسے انہوں نے اداکاری کے ساتھ ساتھ ہدایت کاری کے فرائض سرانجام دیتے ہوئے بھی تخلیق کیا۔
اداکار یاسر نواز نے کہا کہ مجموعی طور پر نادانیاں 108 اقساط پر مشتمل تھا جس میں ہم تینوں یعنی ندا یاسر، دانش اور میرا کم و بیش 50 سے 60 اقساط تک ایک دوسرے سے بات بات پر جھگڑا جاری رہا۔
احسن خان کے ہمراہ ٹائم آؤٹ میں گفتگو کرتے ہوئے یاسر نواز نے کہا کہ ہمیں ذاتی اختلافات کے باعث نادانیاں کی شوٹنگ روکنی پڑ گئی تھی۔
فلم ساز و اداکار یاسر نواز نے کہا کہ ندا یاسر کے رشتہ داروں یعنی میرے سسرالیوں میں سے میرے تعلقات صرف 2 ہی افراد سے اچھے رہے ہیں جن میں ندا کا بھائی اور ان کی مرحوم والدہ شامل ہیں۔
گفتگو کے دوران اداکار یاسر نواز نے انکشاف کیا کہ انہیں اونچائی سے ڈر لگتا ہے اور وہ لمبے وقت پر محیط فضائی سفر سے بھی گھبراتے ہیں۔
ٹائم آؤٹ نامی شو میں احسن خان کے سوالات کا جواب دیتے ہوئے یاسر نواز نے مزید کہا کہ مجھے گنجا ہونے سے بھی خوف محسوس ہوتا ہے۔ عمرے کے دوران میں نے ایک بار دعا کی تھی کہ یا اللہ مجھے کبھی گنجا نہ ہونے دینا۔
دوسری جانب ندا یاسر کا کہنا تھا کہ میں مارننگ شو کیلئے تھیمز اور آئیڈیاز زیادہ تر خود تخلیق کرتی ہوں۔ کبھی کبھار میری ٹیم کی طرف سے بھی آئیڈیاز آجاتے ہیں۔
فنکارہ ندا یاسر نے کہا کہ ہم جب عامر لیاقت کے شو میں مدعو کیے گئے تو میں نے یاسر نواز کو سمجھایا تھا کہ دوسری شادی پر کوئی بھی لطیفے یا پھبتی نہ کسیں۔
مارننگ شو کی میزبان ندا یاسر نے یہ انکشاف بھی کیا کہ جب بھی مجھے پتہ چلتا ہے کوئی فنکارہ یاسر کے قریب آرہی ہے تو میں اس کے ساتھ دوستی گانٹھ لیتی ہوں۔
اپنے شو کے متعلق ندا یاسر کا کہنا تھا کہ جب بھی میں مارننگ شو کا موضوع معلوماتی یا تعلیمی رکھتی ہوں تو اس کی ریٹنگ گر جاتی ہے۔ سب سے زیادہ ریٹنگ شوبز شخصیات کو مدعو کرنے پر ملتی ہے۔
ذاتی زندگی کے بارے میں مختلف انکشافات کرتے ہوئے ندا یاسر نے بتایا کہ جب وہ سو جاتی ہیں تو خراٹے لینے کے ساتھ ساتھ ہنس بھی پڑتی ہیں۔
ایک بار ایسا بھی ہوا کہ ندا یاسر نے صرف اس بات پر ایک اسٹیل کی بوتل مار کر اپنا اسمارٹ ٹی وی مکمل طور پر تباہ کردیا کہ یاسر نے اسے رات کے وقت بند کرنے سے انکار کردیا تھا۔
دورانِ گفتگو ندا یاسر نے یہ انکشاف بھی کیا کہ ایک ایکٹریس کو ڈرامے میں کاسٹ نہ کرنے کا مشورہ نہ ماننے پر ندا نے یاسر کا لیپ ٹاپ توڑ دیا تھا۔ ڈرامہ سیریل نادانیاں ندا یاسر، یاسر نواز اور دانش کے باہمی جھگڑوں کے باعث اختتام کو پہنچا۔
یہ بھی پڑھیں: کیا اداکار بروس ویلس جاسوس تھے؟ جانیے فلموں کے 20 دلچسپ حقائق