مقبوضہ کشمیر میں پی آئی اے کے طیارے نے بھارتی فوج کی دوڑیں لگوا دیں

سری نگر: مقبوضہ جموں و کشمیر میں پی آئی اے کے جہاز کی شکل کا غبارہ ملنے پر بھارتی فوج بوکھلاہٹ کا شکار ہوگئی۔ 

جاسوس کبوتر کی گرفتاری کا دعویٰ کرنے کے بعد بھارت کی ایک اور بد حواسی سامنے آگئی۔ بھارتی میڈیا کے مطابق مقبوضہ کشمیر کے ضلع کٹھوا میں ایک طیارے کی شکل کا غبارہ گرا جس پر پی آئی اے لکھا ہوا ہے اور سبز رنگ کے ساتھ چاند ستارا بھی بنا ہوا ہے۔

یہ غبارہ ہیرانگر سیکٹر کے سوترا چک گاؤں سے ملا جس پر بھارتی پولیس کی دوڑیں لگ گئیں اور انہوں نے اس میں جاسوسی کے آلات ڈھونڈنے شروع کردیے۔ بھارتی پولیس نے اب اس غبارے کو تحویل میں لے کر اس پر مزید تحقیقات شروع کردی ہیں۔

An aircraft-shaped balloon with ‘PIA’ written on it landed in Sotra Chak village of Hiranagar sector yesterday evening. The balloon was taken into custody by police: Jammu and Kashmir Police pic.twitter.com/GVGWmhesYl

— ANI (@ANI) March 10, 2021

اس سے قبل بھارتی سیکیورٹی فورس سرحد پر پاکستانی جاسوس کبوتر پکڑنے کا دعویٰ بھی کرچکی ہیں۔ قابض بھارتی فوج جھنجھلاہٹ اور بدحواسی میں ایسے بے سر و پا الزامات لگاتی ہے جس سے پوری دنیا میں ان کا خود مذاق بنتا ہے۔

یہ بھی پڑھیں : تعلیمی ادارے بند نہیں کرینگے، سندھ نے وفاق کا فیصلہ مستردکردیا، طلبہ اور والدین پریشان

2015 میں بھی پٹھان کوٹ کے علاقے سے ” کبوتر ” کو پکڑ کر پاکستانی جاسوس قرار دے دیا گیا تھا۔ اس خود ساختہ جرم کی پاداش میں کبوتر کے پر بھی کاٹ دیئے گئے تھے۔

سب سے مضحکہ خیز صورت حال اس وقت سامنے آئی تھی جب 2017 میں بھارتی پولیس نے بڑی تگ و دو کے بعد ایک کبوتر کو حراست میں لے لیا تھا اور اس پر بھی جاسوسی کا الزام عائد کیا گیا تھا تاہم سرحدی محافظوں کی نااہلی سے در انداز کبوتر فرار ہونے میں کامیاب ہوگیا تھا۔