محکمہ کسٹم سرکاری خزانے میں حصہ ڈالنے والے اہم اداروں میں سے ایک ہے، گورنر سندھ

کراچی :گورنر سندھ عمران اسماعیل نے کہا ہے کہ محکمہ کسٹم نے کورونا بحران کے دوران مثالی خدمات پیش کرتے ہوئے فراہمی کے موثر نظام کو یقینی بنانے میں اہم کردار ادا کیا،ملک کی معاشی ترقی میں کسٹم کا ادارہ کلیدی کردار ادا کر رہا ہے جبکہ محکمہ کسٹم سرکاری خزانے میں حصہ ڈالنے والے حکومت کے سب سے اہم اداروں میں سے ایک ہے۔

ان خیالات کا اظہار انہوں نے آج کسٹمز ہاؤس کراچی میں کسٹمز کے عالمی دن کے حوالے سے منعقدہ تقریب سے خطاب کرتے ہوئے کیا۔ تقریب میں ڈائریکٹر جنرل پاکستان رینجرز سندھ میجر جنرل افتخار چوہدری بھی شریک تھے۔

تقریب سے خطاب کرتے ہوئے گورنر سندھ نے بین الاقوامی کسٹمز ڈے کی تھیم “ڈیٹا کلچر کو اپناتے ہوئے اور ڈیٹا ایکو سسٹم کی تعمیر کے ذریعے کسٹمز کی ڈیجیٹل تبدیلی کو بڑھانا” کی اہمیت کو اجاگر کیا۔

مزید پڑھیں:محمود مولوی کی ایف بی آراور کسٹمز کوسمندری کیریئر سرچارج کی تحقیقات کی تجویز

گورنر سندھ نے پاکستان کسٹمز کو ڈیٹا اینالیٹکس کو مزید مضبوط اور ترقی دینے کی ضرورت پر بھی زور دیتے ہوئے کہا کہ “کاروبار میں آسانی” کی پالیسی کے تحت، حکومت آن لائن پورٹلز کا استعمال کرتے ہوئے ایک ونڈو کے ذریعے سرمایہ کاروں کو سہولت فراہم کر رہی ہے، اس لئے لوگوں کے فائدے اور بہبود کے لیے ڈیجیٹل ٹیکنالوجیز کو اپنانا ضروری ہے۔

گورنر سندھ نے امید ظاہر کرتے ہوئے کہا کہ مخلصانہ نقطہ نظر اور سرشار کوششوں کے ساتھ بہت جلد پاکستان ایک جدید، شفاف، اسمگلنگ سے پاک ملک اور صحت مند معیشت کے طور پر اقوام عالم کے سامنے اٹھے گا۔

انہوں نے مزید کہا کہ آج کا دن ہمیں تمام ریٹائرڈ اور حاضر سروس افسران کی خدمات کو یاد کرنے کا موقع فراہم کرتا ہے۔ گورنر سندھ نے اعلیٰ کارکردگی کا مظاہرہ کرنے والوں کو ایوارڈز اور خصوصی تعریفی اسناد دیتے ہوئے ان کی خدمات کو بھی سراہا۔