قومی اسمبلی کے مزید 10 ملازمین کورونا کا شکار،3 روز میں تعداد 30 سے تجاوز کر گئی

اسلام آباد:تین روز کے دوران قومی اسمبلی کے کورونا وائرس سے متاثرہ ملازمین کی تعداد 30 سے زائد ہو گئی۔ذرائع کے مطابق قومی اسمبلی کے مزید 10 ملازمین میں کورونا وائرس کی تصدیق ہو گئی ہے۔جس کے بعد قومی ادارہ صحت نے رپورٹ قومی اسمبلی سیکرٹریٹ کو ارسال کر دی ہے۔

ذرائع کے مطابق قومی اسمبلی میں تین دنوں میں 30 سے زائد ملازمین میں کورونا وائرس کی تصدیق ہو چکی ہے۔واضح رہے کہ ملک میں کورونا کیسز کی تعداد روز بروز بڑھتی جا رہی ہے جس میں اراکین اسمبلی بھی شامل ہیں۔

گزشتہ ماہ اسپیکر قومی اسمبلی اسد قیصر میں بھی مہلک وائرس کی تشخیص ہوئی تھی جب کہ چند روز قبل انتقال کرنے والے ممبر قومی اسمبلی منیر اورکزئی بھی کورونا سے متاثر ہوئے تھے۔

ایم کیو ایم کے سینئر رہنما اور رکن رابطہ کمیٹی فیصل سبز واری بھی اپنی فیملی  سمیت کورونا وائرس کا شکار ہوچکے ہیں۔ جبکہ انہوں نے عوام سے اپیل کی ہے کہ وہ احتیاطی تدابیر پر لازمی عمل کریں۔