گوگل نیوز پر ہمیں فالو کریںنومبر کا مہینہ شروع ہوچکا ہے اور عوام یہ جاننے کے لیے بے چین ہیں کہ آیا حکومت 9 نومبر کو یومِ اقبال کی مناسبت سے عام تعطیل کا اعلان کرے گی یا نہیں کیونکہ علامہ اقبال کا یومِ پیدائش اسی دن منایا جاتا ہے۔
میڈیا رپورٹس کے مطابق تاحال وفاقی حکومت نے 9 نومبر کی تعطیل کے بارے میں کوئی نوٹیفکیشن جاری نہیں کیا ہے تاہم گزشتہ سال حکومت نے 9 نومبر کو عام تعطیل کا اعلان کیا تھا جس کی وجہ سے یہ سوال اٹھتا ہے کہ کیا اس سال بھی تعطیل ہوگی یا نہیں۔
حکیم الامت علامہ اقبال 9 نومبر 1877 کو سیالکوٹ میں پیدا ہوئے۔ وہ 20ویں صدی کے ممتاز رہنما، شاعر اور فلسفی کے طور پر ابھرے، جن کی زندگی نے برصغیر کے مسلمانوں پر گہرا اثر ڈالا۔ پاکستان کی تحریک میں ان کا اہم کردار رہا۔
علامہ اقبال نے اردو اور فارسی میں کئی کتابیں لکھیں جن کی شاعری نے قوم میں انقلابی روح پھونک دی۔ بعد میں ان کے بیشتر ادبی کام کو انگریزی، ہسپانوی، چینی، جاپانی، اور دیگر زبانوں میں بھی ترجمہ کیا گیا۔
علامہ اقبال 21 اپریل 1938 کو وفات پا گئے اور وہ پاکستان کے قیام کا دن 14 اگست 1947 نہیں دیکھ سکے۔ قوم انہیں ہمیشہ “مشرق کے شاعر” کے طور پر یاد رکھے گی جنہوں نے پاکستان کا خواب دیکھا تھا۔
یہ بات قابل ذکر ہے کہ رواں سال کے آغاز میں جاری کردہ عام تعطیلات کی فہرست میں 9 نومبر شامل ہے، مگر اس کی حیثیت ابھی غیر واضح ہے۔
