گوگل نیوز پر ہمیں فالو کریںاسلام آباد: الیکشن کمیشن آف پاکستان (ای سی پی) نے جمعرات کو پاکستان تحریک انصاف کے سینیٹر فیصل واوڈا کو دوہری شہریت سے متعلق معلومات چھپانے پر ان کی نااہلی کی درخواست پر اپنے دلائل پیش کرنے کا ”آخری موقع” دے دیا۔
چیف الیکشن کمشنر (سی ای سی) کی سربراہی میں تین رکنی بینچ نے سماعت کی، اس دوران فیصل واوڈا کے وکیل خاندان کے ایک فرد کی علالت کے باعث غیر حاضر رہے۔
سماعت کے دوران، سی ای سی نے نوٹ کیا کہ یہ ثابت ہوا ہے کہ واوڈا کے پاس دوہری شہریت ہے اور اگر وہ اپنی غیر ملکی شہریت ترک کر چکے ہیں، تو انہیں دستبرداری کا سرٹیفکیٹ جمع کرانا چاہیے۔
چیف الیکشن کمشنر نے کہا، اگر وہ اگلی سماعت پر حاضر نہیں ہوئے تو ہم اس معاملے پر فیصلہ محفوظ کر لیں گے، انہوں نے مزید کہا کہ الیکشن کمیشن کو مقدمات کو ختم کرکے اگلے انتخابات کی تیاری شروع کرنی ہے۔
فیصل واوڈا کو مخاطب کرتے ہوئے، سی ای سی نے انہیں یہ اختیار دیا کہ وہ یا تو اپنے دلائل تحریری طور پر پیش کریں، اس صورت میں ای سی پی بنچ اس معاملے پر اپنا فیصلہ محفوظ رکھے گا، یا خود دلائل پیش کریں تاکہ بینچ فیصلہ جاری کر سکے۔
فیصل واوڈا نے دعویٰ کیا کہ ان کے پاس پیدائشی طور پر دوہری شہریت ہے۔ اس پر، سی ای سی نے نشاندہی کی کہ اصل معاملہ یہ ہے کہ کیا 2018 کے عام انتخابات میں حصہ لینے کے لیے کاغذات نامزدگی داخل کرتے وقت فیصل واوڈا کے پاس دوہری شہریت تھی۔
جس پر فیصل واوڈا نے کسی بھی ملک کی قومیت ترک کرنے سے متعلق کاغذی کارروائی سے لاعلمی کا اظہار کیا اور کہا کہ انہوں نے اپنا امریکی پاسپورٹ بھی حوالے کر دیا ہے۔
چیف الیکشن کمشنر نے کہا کہ ہمیں اگلے عام انتخابات کی تیاری بھی شروع کرنی ہے اور اس کیس کی کارروائی میں مزید تاخیر نہیں ہونے دیں گے، انہوں نے سماعت 23 دسمبر تک ملتوی کردی۔
مزید پڑھیں: کسی کوکرپشن کےمعاملات پرمٹی ڈالنےنہیں دینگے،وزیراعظم کادوٹوک پیغام
