گوگل نیوز پر ہمیں فالو کریںایک بار پھر کراچی والوں کومون سون کی شدید بارشوں کا سامنا کرنا پڑا،بارش کے پانی نے شہر کی گلیوں اور یہاں تک کہ بڑی سڑکوں پر سیلابی صورتحال پیدا کردی، مگر اب یہ کراچی والوں کے لئے معمول بن گیا ہے۔کراچی نے ان بارشوں میں موت بھی دیکھی، بمپر ٹریفک بھی دیکھا ہے، ابلتے ہوئے نالے بھی دیکھے ہیں، جبکہ شہر قائد میں بچوں سمیت متعدد افراد بھی شدید بارشوں کے باعث اپنی زندگیوں سے محروم ہوگئے۔
اس تباہی نے شہر کی منصوبہ بندی، ترقی اور انتظام میں ایسی بدترین کوتاہیوں کو بے نقاب کیا،کراچی میں قومی آبادی کا آٹھ فیصد سے زیادہ حصہ آباد ہے۔ محکمہ موسمیات پاکستان کے انتباہ کے باوجود صوبائی حکومت نے اس سلسلے میں کوئی مناسب منصوبہ بندی نہیں کی تھی۔
کراچی کے گلستان جوہر بلاک 3 میں مٹی کا تودہ گرنے سے 80 سے زائد کاریں اور موٹرسائیکلیں تباہ ہوگئیں۔ بارش کا پانی کراچی کے متعدد علاقوں میں گھروں میں داخل ہوگیا۔ ان علاقوں کے رہائشی پانی میں مدد کے انتظار میں رہے اور اپنا قیمتی سامان ضائع ہوتے دیکھتے رہے۔
لیکن بدقسمتی سے، ہمارے حکمران تنقید کا سامنا کرنے کے باوجود بھی ہوش میں نہیں آتے، میئر کراچی نے اپنی الوداعی پریس کانفرنس میں کراچی کی پریشانیوں پر آنسو بہائے۔ مگر کراچی کے عوام مسلسل پریشانیوں کا سامنا کررہے ہیں، ایک بھی سیاستدان کراچی کے عوام سے مخلص نہیں۔
