بیرون ملک پاکستانی ہمارا بہترین قومی اثاثہ ہیں، رانا ثناءاللہ

اسلام آباد: وزیر داخلہ رانا ثناء اللہ نے کہا ہے کہ بیرون ملک پاکستانی ہمارا بہترین قومی اثاثہ ہیں۔

تفصیلات کے مطابق وفاقی وزیر داخلہ رانا ثناء اللہ نے سعودی عرب میں مقیم اوورسیز پاکستانیوں کی استقبالیہ تقریب سے  خطاب کرتے ہوئے شرکاء کو ملک کو درپیش سیاسی اور معاشی چیلنجز سے آگاہ کیا۔

انہوں نے کہا کہ سعودی عرب پاکستان کا بہترین دوست اور برادر ملک ہے جس نے مشکل ترین حالات میں پاکستان کی فراخدلانہ مدد کی۔

وزیرداخلہ رانا ثناء اللہ نے یہ بھی کہا کہ سعودی عرب نے پاکستان کی مشکل ترین حالات میں ہمیشہ مدد کی ہے، پاکستانی ورکرز اور پروفیشنلز کو ملازمت کے مواقع فراہم کرنے پر ہم سعودی حکومت کے شکر گزار ہیں۔

اُن کا کہنا تھا کہ ہماری اتحادی حکومت نے پاکستان کو معاشی طور پر دیوالیہ ہونے سے بچایا، وزیراعظم شہباز شریف کی زیر قیادت ہماری حکومت پاکستان کو جلد معاشی بحران سے نکال لے گی۔

یہ بھی پڑھیں:

شہباز گِل سے بدسلوکی کا الزام، ڈی آئی جی سمیت 2پولیس افسران برطرف

وزیر داخلہ نے کہا کہ اپنی سیاست داؤ پر لگا کر ملکی مفاد میں سخت ترین فیصلے کئے جس کا بوجھ عوام پر بھی پڑا لیکن مشکل وقت اب گزر چکا ہے،پاکستان اب معاشی اور سیاسی استحکام کی طرف گامزن ہے۔

رانا ثناءاللہ نے کہا کہ عمران خان کی حکومت نے آئی ایم ایف سے معاہدے کی خلاف ورزی کرکے ملک دشمنی کی، آئی ایم ایف سے معاہدے کی تجدید میں تاخیر عمران خان حکومت کی یہی وعدہ خلافیاں ہیں۔

انہوں نے یہ بھی کہا کہ آئی ایم ایف سے مالی معاہدے کی تجدید ملکی معیشت اور استحکام کے لئے ناگزیر ہے۔

رانا ثناء اللہ کا کہنا تھا کہ ملک عمرانی فتنے، فساد اور سیاسی انتشار کا متحمل نہیں ہوسکتا،25 مئی کو آئین کی دی گئی طاقت سے ملک میں ریاستی عملداری قائم کی۔

وزیرداخلہ نے کہا کہ حکومت مہنگائی میں بتدریج کمی کیلئے اقدامات کررہی ہے،عوام کوریلیف دینگے جبکہ حکومت اپنی آئینی مدت پوری کریگی اور انتخابات وقت مقررہ پر ہونگے۔

انہوں نے یہ بھی کہا کہ مسلم لیگ (ن) سے زیادہ کسی بھی دوسری سیاسی جماعت نے اوورسیز پاکستانیوں کے مفاد میں فیصلے نہیں لئے، قائد مسلم لیگ (ن) میں محمد نواز شریف آئندہ انتخابات میں جماعت کی قیادت کرینگے۔

وزیر داخلہ کا کہنا تھا کہ بیرون ملک پاکستانی ہمارا بہترین قومی اثاثہ ہیں، ان کی ترسیلات سے ہی معیشت میں استحکام ہے۔

ان کا یہ بھی کہنا تھا کہ بیرون ممالک مقیم پاکستانی اندرون ملک بسنے والے شہریوں سے کہیں زیادہ وطن سے محبت کرنے والے ہیں، بیرون ملک پاکستانیوں کیلئے نادرا ، پاسپورٹ اور دیگر سہولیات میں آسانیاں  پیدا کر رہے ہیں۔

 انہوں نے کہا کہ ای پاسپورٹ کی سہولت کا دائرہ کار عام پاکستانی پاسپورٹ کے اجراء تک بڑھایا جارہا ہے، ای پاسپورٹ سے عام پاکستانی شہریوں کیلئے بھی امیگریشن اور ویزا سہولیات میں آسانی پیدا ہوگی۔

رانا ثناءاللہ نے یہ بھی کہا کہ سعودی عرب میں مقیم تمام پاکستانی شہری ووٹ دینے کے اہل ہیں، ضروری قانون سازی کردی ہے۔

وزیر داخلہ رانا ثناءاللہ نے مزید کہا کہ بیرون ملک پاکستانیوں کے ووٹ ڈالنے کےطریقہ کار کو حتمی شکل دے رہے ہیں، اوورسیز پاکستانیوں کے ووٹ کو آئندہ انتخابات میں یقینی بنائیں گے۔

تقریب کے اختتام پہ سعودی عرب میں مقیم پاکستانیوں نے وزیر داخلہ سے سوالات و جوابات کا ایک سلسلہ بھی کیا۔ وزیر داخلہ نے انکے سوالات کے جواب دئیے جبکہ بیرون ملک پاکستانیوں کو انکے مسائل جلد حل کرنے کی یقین دہانی بھی کرائی۔