سیلاب اور بارشوں سے تباہی، وزیر اعظم نے سفیروں کا اجلاس آج طلب کر لیا

اسلام آباد: وزیر اعظم شہباز شریف نے ملک بھر میں سیلاب سے ہونے والے جانی و مالی نقصانات اور تباہی پر پاکستان میں موجود سفیروں کا اجلاس آج طلب کیا ہے جس کے دوران ملک بھر میں سیلاب سے پیدا ہونے والی صورتحال پر سفراء اور ہائی کمشنرز کو آگہی دی جائے گی۔ 

سماجی رابطے کی ویب سائٹ ٹوئٹر پر اپنے پیغام میں گزشتہ روز وزیر اعظم نے کہا کہ ہم نے مخیر حضرات، دوست ممالک اور بین الاقوامی مالیاتی اداروں سے پاکستان میں سیلاب سے بڑے پیمانے پر ہونے والی تباہی کے سلسلے میں مدد کیلئے رابطہ کیا ہے۔

یہ بھی پڑھیں:

سیلاب متاثرین کیلئے پاک فوج اور وفاقی کابینہ کاایک ماہ کی تنخواہ دینے کا اعلان

ٹوئٹر پیغام میں وزیر اعظم نے اسلام آباد میں کام کرنے والے سفیروں اور ہائی کمشنرز سے جمعہ کے روز ملاقات کرنے کا عندیہ دیتے ہوئے کہا کہ سفیروں کا اجلاس بلانے کا مقصد پاکستان میں سیلاب سے پیدا ہونے والے چیلنجز کی نوعیت اور مدد کی ضروریات سے آگاہ کرنا ہے۔

We have reached out to donors, friendly countries & international financial institutions for assistance to respond to the scale of flood calamity. I will be meeting Islamabad-based ambassadors & high commissioners tomorrow to apprise them of nature of challenge & need for help.

— Shehbaz Sharif (@CMShehbaz) August 25, 2022

خیال رہے کہ اس سے قبل وزیر برائے ماحولیاتی تبدیلی شیری رحمان نے کہا کہ ملک بھر میں بارشوں اور سیلاب کی تباہ کاریوں میں 9 سو سے زائد افراد جاں بحق ہوئے ہیں۔کوئی ایسا شہر نہیں جو سیلاب کی تباہ کاریوں سے محفوظ رہا ہو۔

وفاقی وزیر شیری رحمان نے گزشتہ روز ایک پریس کانفرنس کے دوران افسوس کا اظہار کرتے ہوئے کہا کہ خیبر پختون اور پنجاب میں سیلاب زدگان کی مدد کے بجائے عمران خان نے گزشتہ روز ہری پور میں جلسہ کیا۔