عمران خان کو شہباز گل کے بیان پر معافی مانگنی چاہیے، رانا ثناء اللہ

اسلام آباد: وفاقی وزیر داخلہ رانا ثناء اللہ کا کہنا ہے کہ عمران خان کو شہباز گل کے بیان پر معافی مانگنی چاہیے تھی، لیکن عمران خان نے اپنی پریس کانفرنس میں شہباز گل کے بیان کی تائید کی۔

تفصیلات کے مطابق پریس کانفرنس میں گفتگو کرتے ہوئے رانا ثناء اللہ نے کہا کہ شہباز گل نے کس کو کہا کہ آپ حکم نہ مانیں؟ سی سی ٹی وی میں سب دِکھ رہا ہے کسی نے تشدد نہیں کیا، ویڈیو وائرل ہے، کہاں ڈرائیور پر تشدد کیا گیا، شہباز گل کو قانون کے مطابق رکھا گیا اور عدالت کے سامنے پیش کیا گیا، یہ صفائی کا موقع مانگ رہے ہیں، کیا مجھے صفائی کا موقع دیا گیا تھا؟

انہوں نے کہا کہ شہباز گل کے خلاف مقدمہ درج ہوا ہے، انہیں ایک گاڑی سے دوسری گاڑی میں بٹھایا گیا، ویڈیو وائرل ہے، کہاں ڈرائیور پر تشدد کیا گیا؟ شہباز گل کو قانون کے مطابق گرفتار کرلے عدالت میں پیش کیا گیا، آپ نےلوگوں کو گرفتار کرکے ڈیڑھ سال جیل میں رکھا، مجھےگرفتار کیا گیا، کیا مجھے صفائی کا موقع دیا گیا؟

یہ بھی پڑھیں:

آرمی چیف جنرل قمر جاوید باجوہ سرکاری دورے پر برطانیہ پہنچ گئے

وزیر داخلہ کا کہنا تھا کہ عمران خان کو اپنا کردار اور گفتگو یاد نہیں رہتی، باقاعدہ ایک بیانیہ تیار کیا گیا جس کی سیاسی لیڈر شپ نے منظوری دی، یہ ایک فکس پروگرام تھا، یہ طے ہوا تھا کہ مداخلت نہیں کرنی، فری ٹائم دینا ہے، بیان نشر ہوا، سوشل میڈیا پر چلا تو پھر کارروائی ہوئی۔

ان کا مزید کہنا تھا کہ فوج کے کمانڈ کا حکم نہ ماننے پر اکسانے والے کے خلاف کارروائی ہونی چاہیے، فوج کی کمانڈ کے خلاف بیان پر کمپرومائز نہیں ہوسکتا، کیا شہباز گل نے بیان نہیں دیا، شہباز گل کی آواز نہیں تھی؟

انہوں نے کہا کہ شہدا کے خلاف ٹرینڈ چلانے والے 6 لوگوں کی شناخت ہوگئی ہے اور 78 لوگوں کا پروسیس ہورہا ہے، 120 سے متعلق پی ٹی اے کو لکھا گیا ہے، جو لوگ شناخت ہوئے ہیں ان کا سب کو پتا ہے کہ کون ہیں؟ اس میں کوئی شک نہیں کہ یہ ٹرینڈ پی ٹی آئی کی طرف سے چلایا گیا، اس میں بنیادی طور پر جو لوگ ملوث ہیں ان کا تعلق پی ٹی آئی سے ہے۔