ہارٹ اٹیک اور فالج ہمارے معاشرے میں عام بیماریاں ہیں، عام طور پر دماغ میں خون کی روانی متاثر ہونے سے فالج کا اٹیک ہوتا ہے جبکہ دل کے پٹھوں میں خون کی فراہمی متاثر ہونے سے ہارٹ اٹیک ہوتا ہے۔
یہاں پر یہ بات زیر غور ہے کہ دونوں کی علامات ملتی جلتی ہیں لیکن دونوں کی کچھ ایسی منفرد نشانیاں ہیں جن پر اگر توجہ مرکوز کی جائے تو زندگی کو بچایا جاسکتا ہے۔
فالج یا ہارٹ اٹیک کی علامات کو شناخت کرنے کے ساتھ ساتھ یہ بھی ضروری ہے کہ آپ کو علم ہو کہ اُس پر کیا ردعمل ظاہر کرنا چاہیے۔
اگرچہ دونوں ہی جان لیوا ہوتے ہیں مگر متاثرہ فرد کو جلد اور مناسب طبی امداد میسر آجائے تو بچنے کا امکان بڑھ جاتا ہے۔
فالج یا ہارٹ اٹیک کی علامات کیا ہیں؟
ضروری نہیں کہ جس کو ہارٹ اٹیک ہو اُس کو آغاز میں سینے میں ہی درد ہو اس کے علاوہ بھی اور علامات ہوسکتی ہیں جبکہ ہر فرد کی علامات بھی الگ الگ ہوتی ہیں۔
ہارٹ اٹیک کی ابتدائی عام علامات
سینے میں ایک ایسی ناقابل برداشت تکلیف ہوتی ہے جو کہ پہلے آہستہ آہستہ شروع ہوتی ہے اور بعد میں بڑھتی جاتی ہے۔
بازؤں، کمر، گرد اور جبڑے میں عدم اطمینان کا احساس۔
متلی یا پیٹ میں درد۔
سر چکرانا۔
سانس لینا مشکل ہونا۔
فالج کی ابتدائی علامات
ہارٹ اٹیک کے مقابلے میں فالج کی علامات کو پکڑنا تھوڑا مشکل ہوتا ہے کیونکہ اس کی سب سے عام نشانی منی اسٹروک ہے جس کا سامنا فالج کے اصل دورے سے چند گھنٹے، دن یا مہینوں پہلے ہوسکتا ہے۔
منی اسٹروک کی علامات میں اچانک سردرد، کمزوری یا سن ہونا ، توازن اور چلنے کے مسائل، اچانک بہت زیادہ الجھن اور کھانا نگلنے میں مشکلات قابل ذکر ہے۔
یہ بھی پڑھیں:نہار منہ گرم پانی کے استعمال سے وزن میں تیزی سے کمی لائی جاسکتی ہے