وائٹ ہاؤس میں ڈونلڈ ٹرمپ کا خاص ملازم کرونا وائرس کا شکار

واشنگٹن:امریکی صدر ٹرمپ کا ایک خاص ملازم کورونا وائرس کا شکار ہوگیا ہے۔اس کا کرونا ٹیسٹ کا نتیجہ مثبت آیا ہے۔میڈیارپورٹس کے مطابق پہلے صدر کے ایک قریبی ملازم کا ٹیسٹ مثبت ہونے کی اطلاع دی گئی تھی اور اس کے بعد وائٹ ہاؤس نے اس کی تصدیق کی ہے۔

بین الاقوامی میڈیا کے مطابق یہ ملازم امریکی بحریہ سے تعلق رکھتا ہے۔وائٹ ہاؤس میں برسرزمین کام کرتا ہے اور وہ بالعموم صدر اور ان کے خاندان کے نزدیک ہی ہوتا ہے۔امریکی میڈیا کے مطابق کرونا وائرس کا شکار ہونے والا ملازم صدر کے لیے کھانے کا بندوبست کرتا ہے۔

وائٹ ہاؤس کے ڈپٹی پریس سیکریٹری ہوگن گڈلے نے ایک بیان میں کہا کہ صدرڈونلڈ ٹرمپ اور نائب صدر مائیک پینس کے اس کے بعد کرونا وائرس کے ٹیسٹ کیے گئے ہیں،ان کا نتیجہ منفی آیا ہے اور ان دونوں کی صحت بہت اچھی ہے۔

واضح رہے کہ صدر ٹرمپ، وائٹ ہاؤس میں ان کے قریبی مصاحبین اور وہاں آنے والے مہمانوں کے وقفے وقفے سے باقاعدگی سے کرونا وائرس کے ٹیسٹ کیے جارہے ہیں اور ان کے پندرہ منٹ کے اندر نتائج آجاتے ہیں۔