ملک بھر کی طرح سکھر میں جشن عید میلاد النبی ﷺ کی تقریبات کا انعقاد

سکھر: پورے ملک کی طرح سکھر سیکٹر میں بھی عید میلاد النبی ﷺ کے موقع پر تقریبات کا انعقاد کیا جارہا ہے جبکہ موٹر وے پولیس کی جانب سے سرکاری عمارتوں پر برقی قمقموں سے چراغاں ، ہالانی سے اوباڑو تک مختلف مقامات پر نعت خوانی محافل اور تقریب کا انعقاد کیا گیا۔

تفصیلات کے مطابق آئی جی موٹر وے کلیم امام ، ایڈیشنل آئی جی ساؤتھ ریجن جاوید علی مہر اور ڈی آئی جی موٹر وے سندھ علی شیر جکھرانی کی خصوصی ہدایت پر ایس پی موٹر وے سکھر سیکٹر جاوید اقبال چدھڑ کی زیر نگرانی سکھر سیکٹر میں 12 ربیع الاول جشن عید میلاد النبی ﷺ کے سلسلے میں مختلف تقریبات کا انعقاد کیا گیا۔

تقریبات میں میں موٹر وے پولیس کی سرکاری عمارتوں پر برقی قمقموں سے چراغاں سمیت مختلف مقامات پر نعت خوانی اور ریلیوں کا انعقاد کیا گیا۔ اس سلسلے میں مرکزی تقریب سیکٹر آ فس سکھر میں منعقد کی گئی، جس کے مہمان خصوصی منتظم دارالعلوم سکھر جناب مفتی ولی اللہ تھے۔

یہ بھی پڑھیں

آج عیدمیلاد النبی ﷺشایانِ شان طریقے سے منائیں گے،عمران خان

محسنِ انسانیت حضرت محمدﷺ  کو تمام جہانوں کیلئےرحمت بناکر بھیجا گیا، حلیم عادل شیخ

تقریب سے خطاب کرتے ہوئے مفتی ولی اللہ نے کہا کہ نبی کریم ﷺ  اس دنیا میں رحمت اللعالمین بناکر بھیجے گئے۔ نبی کریم ﷺ سے والہانہ محبت، آپ ﷺ کی تعلیمات پر عمل پیرا ہوکر دنیا اور آخرت میں کامیابی یقینی ہے۔

اس موقع پر ایس پی موٹر وے سکھر سیکٹر جاوید اقبال چدھڑ سمیت موٹر وے پولیس کے دیگر افسران نے نبی کریم ﷺ کی سیرت طیبہ پر روشنی ڈالی۔ ان کا کہنا تھا کہ محکمہ موٹر وے پولیس کی کامیابی کا راز بھی نبی پاک ﷺ کی دی گئی تعلیمات خوشی اخلاقی اورفرض شناسی جیسے اصول ہیں، جس کی بنیاد پر پاکستان ہی نہیں پوری دنیا میں موٹر وے پولیس کو عزت کی نگاہ سے دیکھا جاتا ہے، جس پر موٹر وے پولیس کے افسران و جوان فخر محسوس کرتے ہیں۔

عید میلاد النبی ﷺ کے  حوالے سے موٹر وے پولیس کی جانب سے گمبٹ، خیرپور، پنوعاقل، ڈھرکی میں ریلیوں سمیت نعت خوانی کا بھی انعقاد  کیا گیا، اس کے علاوہ سکھر شہر میں نکالی گئی مرکزی ریلی میں موٹر وے پولیس کے افسران و جوانوں نے بھرپور شرکت کرتے ہوئے نبی پاک ﷺ سے دلی محبت کا اظہار کیا۔