ٹی 20ورلڈ کپ میں پاکستان کی شاندار کارکردگی، رمیز راجہ کا اظہارِ تحسین

لاہور: پاکستان کرکٹ بورڈ کے چیئرمین رمیز راجہ نے ٹی 20 ورلڈ کپ میں قومی کرکٹ ٹیم کی شاندار کارکردگی کو سراہتے ہوئے اطمینان کا اظہار کیا ہے۔ قومی ٹیم کل آسٹریلیا کے خلاف سیمی فائنل میچ کھیلے گی۔

تفصیلات کے مطابق چیئرمین پی سی بی رمیز راجہ نے کہا کہ قومی کرکٹ ٹیم کی اب تک ٹی 20 ورلڈ کپ میں کارکردگی شاندار رہی  جبکہ ٹیم نے اپنی کارکردگی سے غیر مستقل مزاجی کے الزام کو ختم کیا۔ بابر اعظم کی قیادت، کھلاڑیوں کی خود اعتمادی اور میدان میں عاجزی کی وجہ سے پاکستان کی کارکردگی میں تسلسل دیکھا جارہا ہے۔

یہ بھی پڑھیں:

بھارتی شائقینِ کرکٹ کی کوہلی کے الوداعی بیان پر بھی تنقید

ٹی 20 ورلڈ کپ کا فائنل انگلینڈ کھیلے گا یا نیوزی لینڈ، فیصلہ آج ہوگا

چیئرمین پی سی بی رمیز راجہ نے کہا کہ بھارت کے خلاف پاکستان نے شاندار کارکردگی کا مظاہرہ کیا. نیوزی لینڈ کو اچھی حکمت عملی سے شکست دی اور افغانستان کے خلاف بہترین اسپنرز سے نبرد آزما ہوکر کامیابی سمیٹی۔ جیت اور ہار انسان کے ہاتھ میں نہیں مگر ناک آؤٹ مرحلے میں جانے سے قبل ٹیم کا اعتماد بلند ہے۔

رمیز راجہ نے کہا کہ قومی کرکٹ ٹیم اچھی کرکٹ کھیلے، پوری قوم کی دعائیں ان کے ساتھ ہیں۔ بابر اعظم کو کچھ نیا کرنے کی ضرورت نہیں۔ وہ بہت اچھے انداز سے ٹیم کی قیادت کررہے ہیں۔ کوئی بھی کھلاڑی شکست کے خوف سے نہیں ڈر رہا اور اسی برانڈ کی کرکٹ ہمیں آسٹریلیا کے خلاف سیمی فائنل میں کھیلنی ہے۔