گوگل نیوز پر ہمیں فالو کریںاسلام آباد: تحریکِ انصاف کی وفاقی حکومت نے اعلان کیا ہے کہ اراکینِ قومی اسمبلی محسن داوڑ اور علی وزیر ملک سے باہر جانے کی درخواست دیں تو اس پر غور کیا جائے گا۔
سماجی رابطے کی ویب سائٹ ٹوئٹر پرگزشتہ روز اپنے پیغام میں وزیر اعظم کی معاونِ خصوصی برائے اطلاعات و نشریات ڈاکٹر فردوس عاشق اعوان نے کہا کہ ایم این اے محسن داوڑ اور علی وزیر دونوں کے نام ای سی ایل پر ہیں۔
دونوں پی ٹی ایم رہنماؤں کے نام ای سی ایل (ایگزٹ کنٹرول لسٹ) پر ہونے سے آگاہ کرتے ہوئے معاونِ خصوصی نے بتایا کہ انہوں نے افغانستان جانے کے لیے اجازت نہیں مانگی۔
اپنے پیغام میں معاونِ خصوصی فردوس عاشق اعوان نے کہا کہ رکنِ اسمبلی محسن داوڑ کا اس حوالے سے کیا گیا دعویٰ گمراہ کن ہے جو ریاستی اداروں کو بدنام کرنے کی کوشش ہے۔
معاونِ خصوصی اطلاعات فردوس عاشق اعوان نے کہا کہ ای سی ایل کا معاملہ وزارتِ داخلہ کے تحت آتا ہے۔ اگر پی ٹی ایم رہنما باہر جانے کی درخواست دیں تو اسے قانون کے مطابق دیکھا جائے گا۔
ایم این اے محسن داوڑ اور علی وزیر دونوں کے نام ECL پر ہیں۔افغانستان جانے کیلئے انہوں نےاجازت نہیں مانگی۔محسن داوڑ کا دعوی گمراہ کن اور ریاستی اداروں کو بد نام کرنے کی کوشش ہے۔ECL کا معاملہ وزارت داخلہ دیکھتی ہے۔اگر وہ باہر جانے کی درخواست دیں تو اسےقانون کے مطابق دیکھا جائے گا۔
— Dr. Firdous Ashiq Awan (@Dr_FirdousAwan) March 8, 2020
یاد رہے کہ اس سے قبل دارالحکومت اسلام آباد کے انٹرنیشنل ائیرپورٹ پر ایف آئی اے نے پی ٹی ایم رہنماؤں محسن داوڑ اور علی وزیر کو افغانستان جانے سے روک دیا۔
محسن داوڑ اور علی وزیر گزشتہ روز غیر ملکی ائیرلائن کی پرواز آر کیو 928 کے ذریعے اسلام آباد سے کابل جارہے تھے۔دونوں کا نام بیلک لسٹ اور ایگزیٹ کنٹرول لسٹ میں شامل ہونے کی وجہ سے انہیں آف لوڈ کردیا گیا۔
مزید پڑھیں: محسن داوڑ اور علی وزیر کو افغانستان جانے سے روک دیا گیا
