مریم نواز کو ن لیگ میں اہم عہدہ اور مزید اختیارات دینے کا فیصلہ

لاہور: پاکستان مسلم لیگ ن کی نائب صدر مریم نواز کو مسلم لیگ ن میں نائب صدارت کے علاوہ مزید اہم عہدہ دینے کا فیصلہ کیا گیا ہے۔

میڈیا رپورٹ میں بتایا گیا ہے کہ پنجاب میں ضمنی انتخابات کے نتائج اور صوبائی حکومت ختم ہونے کے بعد مسلم لیگ ن ایک بار پھر متحرک ہونے جا رہی ہے اس سلسلے میں صوبے بھر میں سیاسی سرگرمیاں بھرپور انداز میں شروع کرنے کا فیصلہ کیا گیا ہے۔

مسلم لیگ ن کو پنجاب میں مضبوط اور متحرک کرنے کے لیے مریم نواز کو اہم ٹاسک سونپ دیا گیا ہے۔ذرائع نے بتایا کہ مریم نواز جاتی امرا کے بجائے ماڈل ٹاؤن سے پارٹی سرگرمیوں پر نظر رکھیں گی۔

پارٹی سیکرٹریٹ ماڈل ٹاؤن میں مریم نواز کا اپنا الگ دفتر ہو گا جب کہ نواز شریف کی خصوصی ہدایت پر پارٹی کے زیادہ تر ونگز مریم نواز کو رپورٹ کریں گے۔

مزید پڑھیں:عمران خان کو شہباز گل کے بیان پر معافی مانگنی چاہیے، رانا ثناء اللہ

ن لیگ ذرائع کا اس حوالے سے کہنا ہے کہ قیادت کی تفصیلی مشاورت اور نواز شریف کی ہدایت پر مریم نواز کو مزید متحرک اور فعال کیا جائیگا اور اس کیلئے انہیں پارٹی کی نائب صدارت کے ساتھ مزید اہم عہدہ دینے کا بھی فیصلہ کیا گیا ہے۔