امریکا اور اسرائیل دفاعی میزائل سسٹم کی تیاری پر متفق

واشنگٹن: امریکی صدر جوبائیڈن اور اسرائیلی وزیر اعظم نفتالی بینیٹ کے درمیان ٹیلی فونک بات چیت کے دوران دفاعی میزائل نظام ”آئرن ڈوم سسٹم“ کی تیاری پر اتفاق کیا گیا ہے جب کہ بائیڈن نے سال کے آخر میں اسرائیل کے دورے کا عندیہ بھی دیا۔

بین الاقوامی خبر رساں ایجنسی کے مطابق امریکی صدر جو بائیڈن اور اسرائیلی وزیر اعظم نفتالی بینیٹ نے ٹیلی فونک گفتگو میں مشرق وسطیٰ بالخصوص شام، ایران اور افغانستان میں سیکیورٹی معاملات کے علاوہ دفاعی تعاون پر بھی تبادلہ خیال کیا۔

امریکی صدر اور اسرائیلی وزیر اعظم نے 4 سے 70 کلومیٹر فاصلے سے فائر ہونے والے میزائل اور گولوں کو تباہ کرنے کی صلاحیت رکھنے والے دفاعی نظام آئرن ڈوم سسٹم کی تیاری پر اتفاق کیا۔

اسرائیلی وزیر اعظم نفتالی بینیٹ نے اس موقع پر آئرن ڈوم سسٹم کے لیے امریکی تعاون اور ٹھوس حمایت پر امریکی صدر کا شکریہ بھی ادا کیا۔

علاوہ ازیں دونوں رہنماؤں نے دیگر اہم علاقائی امور پر تفصیلی بات چیت کی جس میں خلیجی ممالک کے ساتھ سفارتی تعلقات اور تجارتی تعلقات کی بحالی بھی شامل ہے۔

مزید پڑھیں: ایغور مسلمانوں کا معاملہ، اقوامِ متحدہ انسانی حقوق کے سربراہ کو چین بھیجنے کیلئے تیار

وائٹ ہاؤس سے جاری بیان کے مطابق جو بائیڈن نے اسرائیلی وزیر اعظم کو بتایا کہ وہ اس سال کے آخر میں اسرائیل کا دور ہ کریں گے جب کہ شام میں امریکی فوجی کارروائی میں داعش کے رہنما ابو ابراہیم الہاشمی القریشی کی ہلاکت پر بھی بات چیت کی گئی۔