کراچی میں رات بھر بارش، سڑکیں ندی نالوں میں تبدیل،3افراد جاں بحق

کراچی: شہر قائد میں وقفے وقفے سے بارشوں سے نشیبی علاقے زیر آب آگئے، سڑکیں ندی نالوں میں تبدیل ہو گئیں، مختلف حادثات میں 3 افراد جان کی بازی ہار گئے۔

کراچی میں بارشوں سے حادثات کے سبب مختلف علاقوں میں کرنٹ لگنے سے 3افراد جاں بحق جبکہ لائنز ایریا میں دو منزلہ رہائشی عمارت کا ایک حصہ گر گیا، ریسکیو حکام نے بروقت عمارت میں موجود دو افراد کو نکال لیا۔

ذرائع کے مطابق شہر قائد میں وقفے وقفے سے بارش کے سبب ضلع وسطی، غربی، جنوبی اور شرقی میں جل تھل ایک ہو گیا، ڈیفنس خیابان شہباز میں دو فٹ پانی جمع ہونے سے عبداللہ شاہ غازیؒ، کے پی ٹی اورسب میرین انڈرپاس پانی سے بھر گئے، ٹریفک معطل ہو کر رہ گئی۔

انتظامیہ نے شہریوں کو گھروں میں رہنے کی ہدایت کی ہے، محکمہ موسمیات نے آج مزید بارشوں کی پیشگوئی کر رکھی ہے۔کراچی سے حیدر آباد جانے والا ناردرن بائی پاس زیر آب آ گیا، موٹروے ایم نائن کچھ دیر بند رہنے کے بعد ٹریفک کیلئے بحال کر دیا گیا،سعدی ٹاؤن میں بھی پانی آنے کا خدشہ ظاہر کیا جارہا ہے۔

بلوچستان میں بھی شدید بارشوں نے تباہی مچادی، لسبیلہ وندرندی میں طغیانی سے کئی گوٹھ زیر آب آ گئے، ہزاروں افراد کو محفوظ مقامات پر منتقل کر دیا گیا۔

صوابی میں بھی موسلادھار بارشوں سے ندی نالے بپھر گئے، سڑکیں تالاب میں تبدیل ہوئیں اور پانی گھروں میں داخل ہو گیا، متاثرہ علاقوں میں بد ترین لوڈشیڈنگ کا سلسلہ جاری ہے۔