گوگل نیوز پر ہمیں فالو کریںپاکستان تحریک انصاف کے سینئر رہنما ہمایوں اختر خان نے کہا ہے کہ مولانا فضل الرحمان اور ان کا آزادی مارچ حکومت کیلئے خطرہ نہیں ہیں جبکہ انہیں روکنے کیلئے ہمیں باہر کے ممالک سے سفارشیں کرانے کی ضرورت نہیں۔
سابق وفاقی وزیر ہمایوں اختر خان نے اپنے دفتر میں ملاقات کیلئے آنے وفود سے گفتگو کرتے ہوئے کہا کہ حکومت نہیں بلکہ اپوزیشن مارچ کی ممکنہ ناکامی کی صورت میں اپنی رہی سہی سیاست کا جنازہ نکلنے کے خوف میں مبتلا ہے جبکہ عالمی ادارے تسلیم کر رہے ہیں کہ حکومت معیشت کی بہتری کیلئے درست سمت میں پیشرفت کر رہی ہے ۔
یہ بھی پڑھیں: ن لیگ نے عالمی بینک کی رپورٹ کو حکومت کا معاشی سیاہ اعمال نامہ قرار دےدیا
پی ٹی آئی رہنما ہمایوں اختر خان نے کہاکہ مولانافضل الرحمان کی ضد کی وجہ سے اپوزیشن کو چیئرمین سینیٹ کے خلاف تحریک عدم اعتماد کے موقع پر بھی رسوا ئی کا سامناکرنا پڑا ۔ شاید اسی سبکی کو مٹانے کے لئے آزادی مارچ کاشوشہ چھوڑاگیاہے۔
ہمایوں اختر خان نے کہا کہ پیپلز پارٹی اور (ن) لیگ کا ورکراپنی قیادت کی کال پر باہر نہیں نکلتاوہ کیوں مولانا فضل الرحمان کیلئے باہر آئے گا ۔ ہمیں معلوم ہے کہ اقتدار سے دوری مولانا فضل الرحمان کو بے چین کر رہی ہے لیکن انہیں پانچ سال تک عوام کے مینڈیٹ کا احترام کرنا ہوگا۔
انہوں نے کہاکہ عالمی اداروں کی حالیہ رپورٹس میں بر ملا کہا گیا ہے کہ پاکستان کو درپیش موجودہ مشکلات ماضی کی حکومتوں کے اقدامات کانتیجہ ہیں اور تحریک انصاف کی حکومت معیشت کے استحکام کیلئے درست سمت میں گامزن ہے، 80فیصد ملازمتیں نجی شعبہ پیدا کرتا ہے اور انشا اللہ آنے والے مہینوں میں انٹرسٹ ریٹ کم ہوگا۔
انٹرسٹ ریٹ کم ہونے کے حوالے سے ہمایوں اختر خان نے کہا کہ ا س سے انڈسٹریل گروتھ بڑھنے سے روزگار کے مواقع پیدا ہوں گے ۔وزیر اعظم عمرا ن خان کی قیادت میں دنیا پاکستان کی اہمیت اور کردار کو تسلیم کر رہی ہے جس کی وجہ سے اپوزیشن حسد میں مبتلا ہے ۔
ان کا کہنا تھا کہ عوام بہترین منصف ہیں اور انہوں نے ہی پانچ سال بعدفیصلہ کرنا ہے ،اگر ہم اپنے منشوراور وعدوں کی تکمیل نہ کر سکے توعوام پیپلزپارٹی اور (ن) کی طرح ہمیں بھی مسترد کردینگے اورہم اسے تسلیم کریں گے لیکن ایک سے ڈیڑھ سال میں حکومت کے ناکام ہونے کا منفی پراپیگنڈاکرکے عوام کی آنکھوں میں دھول نہیں جھونکی جا سکتی ۔
یاد رہے کہ اس سے قبل قائد حزبِ اختلاف پنجاب اسمبلی حمزہ شہباز نے کہا کہ ن لیگ آزادی مارچ میں شامل ہوگی جبکہ نواز شریف اور شہباز شریف میں اس حوالے سے کوئی اختلاف نہیں۔
احتساب عدالت لاہور میں پیشی کے موقعے پر میڈیا نمائندگان سے غیر رسمی گفتگو کرتے ہوئے حمزہ شہباز نے کہا کہ قو م کوتبدیلی بہت مہنگی پڑی ہے اور وہ اس پر لعنت بھیج رہی ہے۔
مزید پڑھیں: حمزہ شہباز کا فضل الرحمان کے آزادی مارچ میں شامل ہونے کا اعلان
