گوگل نیوز پر ہمیں فالو کریںاسلام آباد:وزیر خارجہ شاہ محمود قریشی نے کہا ہے کہ کورونا وبا کی روک تھام میں آسیان کے موثر اقدامات لائق تحسین ہیں۔
ترجمان دفتر خارجہ کے مطابق وزیر خارجہ مخدوم شاہ محمود قریشی نے54 ویں یوم آسیان پراپنے پیغام میں کہاکہ پاکستان کی حکومت اور عوام کی جانب سے اور ذاتی طورپر میں جنوب مشرقی ایشیاء کی اقوام کی تنظیم (آسیان) کے رکن ممالک کو چَوَّن ویں یوم آسیان پر مبارک پیش کرتا ہوں۔
انہوں نے کہاکہ آٹھ اگست وہ تاریخی دن ہے جب 1967 میں پانچ جنوب ایشیائی اقوام نے ایک مشترکہ ادارہ تشکیل دیا تھا جس کی بنیاد تعاون، دوستی وبھائی چارے اور عدم مداخلت کے اصولوں پر رکھی گئی تھی۔
انہوں نے کہاکہ 54سال سے زائد عرصے میں آسیان طویل المدتی اور اجتماعی اہداف کا جدید ادارہ بن کر ابھرا ہے جو ایک فعال اور یکجا معاشی برادری میں ڈھل چکا ہے۔
انہوں نے کہاکہ آسیان بلاامتیاز معاشی یکجائی کے اصول’اوپن ریجنل ازم‘ کی ایک بہترین اورقابل تقلید مثال ہے۔ انہوں نے کہاکہ کورونا وبا کی روک تھام میں آسیان کے موثر اقدامات لائق تحسین ہیں۔
آسیان کے ساتھ پاکستان کی قربت کا اظہار جنوب مشرقی ایشیاء میں تعاون اور دوستی وبھائی چارے کے معاہدے میں شمولیت کے علاوہ آسیان کی قیادت میں علاقائی نظاموں میں شرکت سے بخوبی ہوتا ہے۔
انہوں نے کہاکہ پاکستان نے 1993 میں مختلف شعبوں میں بات چیت کیلئے آسیان کے ساتھ شراکت داری قائم کی تھی اور2004 میں آسیان ریجنل فورم (اے آر ایف) کا رکن بنا تھا۔
آسیان کی بصیرت افروز قیادت نے خطے اور دنیا میں بات چیت اور تعاون کی راہ قائم کی جبکہ آسیان کی مرکزیت کو بھی برقرار رکھا جو بجا طورپرقابل تحسین ہے۔
انہوں نے کہاکہ وژن ایسٹ ایشیاء‘ پالیسی کی روشنی میں خطے کو جوڑنے اور عوامی رابطوں کو بہتر بنا کر آسیان کے ساتھ اپنے روابط کو مزید توانا وطاقتور بنانے کو پاکستان بے انتہاء اہمیت وترجیح دیتا ہے۔
مزید پڑھیں: دفتر خارجہ نے مقبوضہ وادی میں دہشتگرد داخل کرنے کا بھارتی الزام مسترد کردیا
