بیجنگ: صدرِ مملکت ڈاکٹر عارف علوی نے ہمسایہ ملک چین کا دورہ کیا جہاں انہوں نے چینی ہم منصب ژی جن پنگ سے ملاقات کی جس کے دوران کورونا وائرس سمیت دیگر اہم بین الاقوامی امور پر سیر حاصل گفتگو ہوئی۔
سماجی رابطے کی ویب سائٹ ٹوئٹر پر اپنے پیغام میں صدرِ مملکت ڈاکٹر عارف علوی نے اِس حوالے سے عوام کو آگاہ کرتے ہوئے بتایا کہ صدرِ چین ژی جن پنگ نے دورے کے لیے انہیں خصوصی دعوت دی تھی۔
صدرِ مملکت نے کہا کہ میرا دورۂ چین دباؤ سے بھرپور اوقات میں چینی عوام اور حکومت کے ساتھ اظہارِ یکجہتی کے لیے ہے جبکہ انہوں نے کورونا وائرس جیسی وبا کا سامنا کیا۔
کورونا وائرس جیسی وبا کا ڈٹ کر مقابلہ کرنے کے لیے صدرِ مملکت ڈاکٹر عارف علوی نے چینی حکومت کے اقدامات کو سراہتے ہوئے کہا کہ چین نے وہان میں موجود ہمارے طلباء کا بھی خیال رکھا۔
وائرس کی وبا کی پاکستان آمد پر تشویش کا اظہار کرتے ہوئے صدرِ مملکت نے کہا کہ دورۂ چین کے دوران پاکستان میں کورونا وائرس کا مقابلہ کرنے کے حوالے سے بھی تفصیلی گفتگو ہوئی۔
دورۂ چین کے دوران صدرِ مملکت نے پاک چین دوستی اور ہر اہم موقعے پر ایک دوسرے کا ساتھ دینے کی درخشاں روایت کے حوالے سے بھی تبادلۂ خیال کیا۔
My visit to China on invitation of President Xi Jinping was to show solidarity with China in stressful times, appreciate their outstanding effort to contain Coronavirus & for taking good care of students in Wuhan. How to #iFightCorona War in Pakistan was discussed in great detail https://t.co/n5374FD3Po
— Dr. Arif Alvi (@ArifAlvi) March 18, 2020