پیپلز پارٹی اور(ن) لیگ نے این اے 133 کے ضمنی الیکشن کیلئے امیدواروں کا اعلان کر دیا

لاہور: پاکستان تحریک انصاف کی جانب سے جمشید اقبال چیمہ کو نامزد کیے جانے کے بعد پاکستان مسلم لیگ (ن) اور پاکستان پیپلز پارٹی نے لاہور میں این اے 133 کے ضمنی انتخاب کے لیے اپنے امیدواروں کا اعلان کر دیا۔

مسلم لیگ (ن) کے صدر شہباز شریف نے مسلم لیگ (ن) کے رہنما پرویز ملک کی بیوہ شائستہ پرویز ملک کو ٹکٹ دینے کی منظوری دے دی ہے ،مسلم لیگ (ن) کی ترجمان مریم اورنگزیب نے تصدیق کی ہے کہ پارٹی نے شائستہ پرویز ملک کو اس حلقے سے ضمنی الیکشن لڑنے کیلئے ٹکٹ دیا ہے۔

دریں اثنا پیپلز پارٹی نے چوہدری اسلم گل کو ضمنی انتخاب کے لیے اپنا امیدوار نامزد کیا ہے ، یہ اعلان پیپلز پارٹی کے رہنماء اور سابق وزیراعظم راجہ پرویز اشرف نے کیا۔

مزید پڑھیں:ضمنی الیکشن اور انتخابی نظام

راجہ پرویزاشرف کاکہنا ہے کہ پیپلز پارٹی این اے 133 میں بھرپور مہم چلائے گی اور اس نشست پر کامیابی حاصل کرے گی ، انہوں نے مزید کہا کہ پارٹی کارکن مہم کے لیے پرجوش ہیں۔

انہوں نے مہنگائی سے نمٹنے اور ملک کے مستقبل کے بارے میں جلد بازی میں فیصلے کرنے میں حکومت کے غیر ذمہ دارانہ رویے پر افسوس کا اظہار کیا ۔

ایک روز قبل وزیراعظم کے معاون خصوصی برائے فوڈ سیکورٹی جمشید اقبال چیمہ نے اپنے عہدے سے استعفیٰ دے دیا تھا۔

جمشید اقبال چیمہ لاہور کے حلقہ این اے 133 میں پاکستان تحریک انصاف کے امیدوار کی حیثیت سے ضمنی الیکشن لڑیں گے۔ انہوں نے اپنی انتخابی مہم بھی شروع کر دی ہے۔