گوگل نیوز پر ہمیں فالو کریںاسلام آباد: وزیر اعظم عمران خان نے برطانوی ہم منصب بورس جانسن کی والدہ کے انتقال پر تعزیت کا اظہار کیا ہے جبکہ شارلٹ جانسن کا انتقال منگل کے روز لندن کے ہسپتال میں ہوا۔
سماجی رابطے کی ویب سائٹ ٹوئٹر پر اپنے پیغام میں وزیر اعظم عمران خان نے کہا کہ والدہ کے انتقال پر میں اپنے ہم منصب بورس جانسن سے تعزیت کا اظہار کرتا ہوں۔
تعزیتی پیغام میں وزیر اعظم عمران خان نے مزید کہا کہ مشکل کی اِن گھڑیوں میں میری دعائیں، ہمدردیاں اور نیک تمنائیں بورس جانسن اور ان کے اہلِ خانہ کے ساتھ ہیں۔
والدہ کے انتقالِ پرُملال پر میں وزیراعظم @BorisJohnson سے تعزیت کا اظہار کرتا ہوں۔ ان کٹھن گھڑیوں میں میری دعائیں اور ہمدردیاں ان اور ان کے اہلِ خانہ کے ساتھ ہیں۔
— Imran Khan (@ImranKhanPTI) September 14, 2021
قبل ازیں منگل کے روز بورس جانسن کی 79 سالہ والدہ شارلٹ جانسن انتقال کر گئیں جو پیشہ ور مصورہ کے طور پر مشہور تھیں۔ انہوں نے 1942 میں آکسفورڈ میں آنکھ کھولی۔
سر جیمز فوسیٹ کے ہاں جنم لینے والی شارلٹ جانسن یورپی کمیشن برائے انسانی حقوق کی صدر بنیں اور 1963 میں موجودہ برطانوی وزیر اعظم کے والد سے شادی کی۔
اسٹینلے سے شادی کے بعد شارلٹ جانسن کے ہاں 4 بچوں کی پیدائش ہوئی۔ دونوں میاں بیوی 1979 میں الگ ہو گئے۔ شارلٹ جانسن نے امریکی پروفیسر نکولس واہل سے دوبارہ شادی کر لی۔
خیال رہے کہ اِس سے قبل وزیراعظم پاکستان کا اپنے برطانوی ہم منصب بورس جانسن سے ٹیلی فونک رابطہ ہوا، عمران خان نے پاکستان کو سفری ریڈ لسٹ میں ڈالنے کے معاملے پر گفتگو کے دوران اس فیصلے پر نظر ثانی پر زور دیا۔
دونوں وزرائے اعظم نے 3 ماہ قبل مختلف امور پر بات چیت کی جبکہ دو طرفہ تعلقات، خطے کی صورتحال اور افغان امن عمل پر بھی تبادلہ خیال کیا۔عمران خان نے کورونا سے مؤثر طور پر نمٹنے کیلئے بورس جانسن کی کاوشوں کوسراہا۔
مزید پڑھیں: وزیراعظم کا برطانوی ہم منصب بورس جانسن سے ٹیلی فونک رابطہ
