وزیراعظم عمران خان نے پاکستان میں دل کے اسٹنٹس کی تیاری کا افتتاح کردیا

اسلام آباد: وزیراعظم عمران خان نے نیشنل یونیورسٹی آف سائنس اینڈ ٹیکنالوجی (نسٹ) سائنس پارک میں کارڈیک اسٹنٹ کی تیاری کا افتتاح کردیا،اس سہولت کے بعد ملک دل کی بیماری کے اس علاج میں خودکفیل ہوگیا۔

وزیراعظم عمران خان نے نسٹ میں کارڈیک اسٹنٹس کے پروڈکشن یونٹ کا افتتاح کیا، جس کے بعد پاکستان اسٹنٹ تیار کرنے والے دنیا کے 18 ممالک میں شامل ہوگیا اور مسلم دنیا کا دوسرا ملک بن گیا۔ واضح رہے کہ عالم اسلام میں ترکی کے بعد پاکستان دوسرا ملک ہے جسے یہ اعزاز حاصل ہوا۔

مقامی طور پر اسٹنٹ تیار ہونے سے ملک میں دل کے مریضوں کو معیاری اور سستے اسٹنٹ دستیاب ہوں گے جبکہ ملک کو سالانہ 8 ارب روپے کی بچت ہوگی اور مریضوں کے لئے ایک انقلابی کامیابی ہے۔

PM @ImranKhanPTI inaugurates N-Ovative Health Technology Facility at @Official_NUST, Islamabadhttps://t.co/L9v5JrWnSf@PakPMO @MoIB_Official pic.twitter.com/Ex3j4xRsui

— Radio Pakistan (@RadioPakistan) October 16, 2020

وفاقی وزیر سائنس اینڈ ٹیکنالوجی فواد چوہدری نے ٹوئٹ کرتے کہا کہ میڈیکل ٹیکنالوجی میں پاکستان کا ایک اور بڑا قدم، وزیراعظم نے نسٹ سائنس پارک میں دل کے اسٹنٹس کی مینو فیکچرنگ کا افتتاح کردیا۔

اُن کا کہنا تھا کہ یہ اسٹنٹس یورپی معیار کے مطابق ہیں، اس سہولت کے نتیجے میں پاکستان دنیا کے چند ممالک میں شامل ہو گیا ہے جو اسٹنٹس بنانے کی میڈیکل ٹیکنالوجی کے حامل ہیں،یہ ایک بہت بڑا کارنامہ ہے۔

مزید پڑھیں: وزیراعظم نے تحریک انصاف کی پارلیمانی پارٹی کا اجلاس آج طلب کرلیا