گوگل نیوز پر ہمیں فالو کریںکیلیفورنیا: اگر گلوبل وارمنگ اپنی موجودہ رفتار سے بڑھتی رہی تو اس صدی کے آخر تک اینٹارکٹیکا کے نصف سے زیادہ مقامی جاندار ناپید ہوجائیں گے۔
جرنل پی ایل او ایس بائیولوجی میں شائع ہونے والی ایک تحقیق کے مطابق اگر دنیا نے فاسل ایندھن سے خارج ہونے والی آلودگی پر قابو نہ پایا تو اینٹارکٹیکا کے مقامی پودے اور جانوروں کی اقسام (بشمول پینگوئن) اس صدی کے آخر تک ممکنہ طور پر ختم ہوجائیں گی۔
تحقیق کے مطابق اینٹارکٹیکا میں ماحول کے تحفظ کے لیے جاری کوششیں تیزی سے بدلتے برِ اعظم پر کارگر نہیں ہورہی ہیں۔ جس سے محققین نے یہ نتیجہ اخذ کیا کہ کم لاگت والے مزید لائحہ عمل کا اطلاق اینٹارکٹیکا کے خطرے سے دوچار حیاتیاتی تنوع کو 84 فی صد تک محفوظ کر سکتا ہے۔
واٹس ایپ پر ڈیلیٹ کیے گئے میسج کو واپس لانے کا فیچر متعارف
تحقیق کی سربراہ مصنفہ جیسمین لی کے مطابق چونکہ اینٹارکٹیکا میں بڑی تعداد میں لوگ نہیں آباد اس لیے اس خطے کا موسمیاتی تغیر میں کوئی خاص حصہ نہیں ہے لہٰذا اس برِ اعظم کو سب سے زیادہ خطرہ اس خطے کے باہر سے ہے۔
انہوں نے کہا کہ ہمیں موسمیاتی تغیر پر علاقائی سطح پر کی جانے والی ماحولیات کے تحفظ کی کوششوں کے ساتھ عالمی سطح پر کوششوں کی ضرورت ہے تاکہ اینٹارکٹیکا میں جانداروں کو بقا کا بہترین موقع دیا جائے۔
تحقیق میں بتایا گیا کہ اینٹارکٹیکا میں ختم ہوتی برف ایمپرر اور ایڈیل نسل کی پینگوئن کو خطرے سے دوچار کردے گی جو اپریل سے دسمبر تک برف پر انحصار کرتی ہیں۔
