گوگل نیوز پر ہمیں فالو کریںشمالی وزیرستان میں سیکیورٹی فورسز کے آپریشن کے دوران ہلاک دہشت گرد افغان شہری نکلا، پاک فوج کے شعبہ تعلقاتِ عامہ (آئی ایس پی آر) نے تصدیق کردی ہے۔
پاک فوج کے شعبہ تعلقات عامہ (آئی ایس پی آر) کا اپنے بیان میں کہنا ہے کہ 6 فروری کو شمالی وزیرستان کے علاقے دتہ خیل میں سکیورٹی آپریشن کیا گیا جس کے دوران دہشت گردی میں ملوث ایک شخص ہلاک ہوگیا جس کی شناخت افغان شہری لقمان خان عرف نصرت کے نام سے ہوئی ہے۔
شعبہ تعلقاتِ عامہ (آئی ایس پی آر) کا کہنا ہے کہ یہ دہشت گرد کمال خان کا بیٹا ہے، جو سپیرا ڈسٹرکٹ، خوست صوبہ، افغانستان کا رہائشی ہے، اور افغان شہری ہونے کے باعث ہلاک دہشت گرد کی لاش تحویل میں لینے کیلئے عبوری افغان حکام سے رابطہ کیا جارہا ہے۔
آئی ایس پی آر کا کہنا ہے کہ اس قسم کے واقعات پاکستان میں دہشت گردی کی سرگرمیوں میں افغان شہریوں کے ملوث ہونے کا ناقابل تردید ثبوت ہیں۔ پاکستان کو توقع ہے کہ عبوری افغان حکومت اپنی ذمہ داریاں پوری کرے گی، دہشت گردوں کی جانب سے پاکستان کے خلاف دہشت گردی کی کارروائیوں کے لیے افغان سرزمین استعمال کرنے کی اجازت نہیں دے گی۔
