اُمید ہے کہ K2پر جانے والے 3کوہ پیماں زندہ ہوں گے، اہلخانہ پر اُمید

اسکردو: K2 پر لاپتہ 3 کوہ پیماؤں کے اہلخانہ کو اب بھی ان کے زندہ ہونے کی اُمید ہے، اہلخانہ کی جانب سے ریسکیو آپریشن جاری رکھنے کا حتمی فیصلہ کرلیا گیا ہے۔

مشترکہ بیان میں لاپتہ تینوں کوہ پیماؤں کے اہل خانہ کا کہنا ہے کہ 4 روزہ مسلسل فضائی تلاش میں کچھ پتہ نہیں چل سکا،منجمد درجہ حرارت، تیزہوا اور دھند کے باعث سرچ اینڈ ریسکیو آپریشن میں کامیابی حاصل نہ ہوسکی۔

انہوں نے بتایا کہ لاپتہ کوہ پیماؤں کی تلاش کے لیے پس پردہ بہت کام ہو رہا ہے، سرچ ٹیم آئس لینڈ اسپیس ایجنسی کے ساتھ مل کرکام کر رہی ہے، اور کوہ پیماؤں کی تلاش کے لیے سنتھیٹک اپرچر ریڈار کی جدید ٹیکنالوجی استعمال کی جا رہی ہے۔

مشترکہ اعلامیے میں کوہ پیماؤں کے اہلخانہ نے ریسکیو آپریشن جاری رکھنے کا فیصلہ کیا ہے، ان کا کہنا ہے کہ جدید نظام کے ذریعے پہاڑ کی بلندی پر ایک ایک انچ کی معلومات حاصل کر سکتے ہیں۔

مائیکرو سیٹلائٹ ارتھ آبزرویشن ٹیکنالوجی سے ہر مربع میٹر، ہر گھنٹہ تلاش کرسکتے ہیں، جن بلندیوں پر ہیلی کاپٹر کی پہنچ ممکن نہ ہو وہاں یہ ٹیکنالوجی بہت کار آمد ہے۔

ممکن ہے کوہ پیماؤں نے برف کاغار بنایا ہو اور اس کے اندر پناہ لی ہو، برفانی غار میں کھانیکی چیزیں پانی گرم کرنیکی سہولت ہو تو زندگی ممکن ہے، ہم کوہ پیماؤں کے پاس موجود آلات سے اضافی معلومات حاصل کر رہے ہیں۔

لاپتہ کوہ پیماؤں کے اہلخانہ نے آرمی چیف، عسکری ادارہ تعلقات عامہ اور آرمی ایوی ایشن کے علاوہ آئس لینڈ کے وزیر خارجہ اور چیف آف ڈیفنس سمیت پاکستانی قوم کا بھی شکریہ ادا کیا گیا ہے جو کہ کوہ پیماؤں کے لیے دعاگو ہیں اور ان کی جلد آمد کے لئے بے چین ہیں۔