گوگل نیوز پر ہمیں فالو کریںکراچی: شہر قائد کی محرومیوں کا دل سے احساس کرنے والی پروین رحمان 8برس قبل فانی دنیا کو خیر باد کہہ گئیں تھیں۔ پروین رحمان کی کارکردگی اور ان کے خلوص کا گوگل بھی معترف ہوگیاہے۔
سماجی کارکن پروین رحمان کی سماجی خدمات اور قربانی کی بدولت دنیا کے مقبول ترین سرچ انجن گوگل نے اپنا ڈوڈل پاکستان کی سماجی کارکن پروین رحمان کے نام کردیا گوگل نے یہ خراجِ عقیدت پروین رحمان کی 65 ویں سالگرہ کے موقع پر انہیں پیش کیا۔
خیال رہے کہ 13 مارچ 2013 کو سماجی کارکن پروین رحمان کو کراچی کے منگھو پیر روڈ پر اپنے دفتر جاتے ہوئے ایک موٹر سائیکل پر سوار دو افراد نے فائرنگ کرکے بے رحمی سے قتل کردیا تھا۔
سماجی کارکن پروین رحمان کے بے رحمانہ قتل کے بعد پولیس تحقیقات کے سلسلے میں تحریک طالبان پاکستان کے مقامی رہنما قاری بلال کو گرفتار کرنے پہنچی تو وہ جعلی مقابلے میں مارا گیا تھا، جس کے بعد کیس کی فائل بند ہوگئی تھی۔
سپریم کورٹ نے بعد ازاں اپریل 2015 میں اس کیس کا از خود نوٹس لیتے ہوئے تحقیقات دوربارہ کرنے کا حکم جاری کیا تھا جس پر ایک جے آئی ٹی بنائی گئی تھی جس نے رحیم سواتی کو خیبرپختون خواہ کے علاقے سے گرفتار کیا اور پھر اس نے تفتیش کے دوران پروین رحمان کے قتل کا اعتراف بھی کیا۔
پروین رحمان نے ایک صحافی کو دیئے گئے اپنے آخری انٹرویو میں بتایا تھا کہ انہیں لینڈ گریبر اور دیگر جرائم پیشہ افراد کی جانب سے ہراساں اور سنگین نتائج کی دھمکیاں موصول ہورہی ہیں۔
مزید پڑھیں: لیجنڈاداکار معین اختر کا یوم پیدائش، گوگل نے بھی خراج عقیدت پیش کیا
