گوگل نیوز پر ہمیں فالو کریںعالمی منڈی میں پیر کے روز خام تیل کی قیمتوں میں تقریباً 3 فیصد اضافہ ریکارڈ کیا گیا جس کے بعد برینٹ کروڈ کی قیمت 90 ڈالر فی بیرل سے اوپر چلی گئی۔
برینٹ خام تیل کے مستقبل کے معاہدوں میں 2.69 ڈالر یعنی 3.05 فیصد اضافہ ہوا جس کے بعد قیمت 90.79 ڈالر فی بیرل تک پہنچ گئی۔ یہ سطح 11 جون کے بعد سب سے زیادہ ہے۔ گزشتہ ہفتے بھی برینٹ کی قیمتوں میں 15.9 فیصد اضافہ ہوا تھا جو اپریل کے بعد سب سے بڑا ہفتہ وار اضافہ قرار دیا جا رہا ہے۔
امریکی خام تیل ویسٹ ٹیکساس انٹرمیڈیٹ (WTI) کی قیمت بھی 2.19 ڈالر یا 2.65 فیصد بڑھ کر 84.68 ڈالر فی بیرل ہو گئی جو 12 جون کے بعد بلند ترین سطح ہے۔ گزشتہ ہفتے ڈبلیو ٹی آئی کی قیمتوں میں 15.5 فیصد اضافہ ریکارڈ کیا گیا جو مارچ کے آغاز کے بعد سب سے بڑا ہفتہ وار اضافہ ہے۔
مشرق وسطیٰ میں جاری تنازعے میں گزشتہ ہفتے کے اختتام پر مزید شدت آگئی جہاں امریکا نے ایران کے خلاف مسلسل نویں رات بھی حملے کیے جبکہ امریکی اتحادی ممالک کویت اور بحرین نے بھی ایرانی حملوں کی اطلاعات دی ہیں۔
بارکلیز کے تجزیہ کار کے مطابق آنے والے دنوں اور ہفتوں میں واضح ہو سکے گا کہ دوبارہ عائد کی جانے والی دو طرفہ ناکہ بندیوں کے دوران خطے سے تیل کی برآمدات کس سطح تک برقرار رہ سکتی ہیں۔
انہوں نے مزید کہا کہ موجودہ صورتحال میں تیل کی عالمی مارکیٹ ممکنہ اثرات کو کم سمجھ رہی ہے خاص طور پر ذخائر پر پڑنے والے دباؤ کو، کیونکہ جنگ کے آغاز کے مقابلے میں اب تیل کے ذخائر گزشتہ پانچ برسوں کی کم ترین سطح پر ہیں۔
ایل ایس ای جی کے اعداد و شمار کے مطابق اتوار کے روز صرف چار بحری جہاز آبنائے ہرمز سے گزر سکے جبکہ ایک روز قبل یہ تعداد آٹھ تھی۔ اعداد و شمار کے مطابق جمعہ کے بعد سے کم از کم تین آئل پروڈکٹس ٹینکرز اور ایک بہت بڑا خام تیل بردار جہاز تیل کی لوڈنگ کے لیے اس اہم بحری راستے میں داخل ہوئے ہیں۔
