فیصل آباد میں شادی سے مبینہ انکار پر لڑکی پر تشدد، ملزمان نے ویڈیوز سوشل میڈیا پر وائرل کردیں

تفصیلات کے مطابق شادی سے انکار کرنے پر معروف صنعتکار شیخ دانش اور اس کی بیٹی انا شیخ سمیت 16 ملزمان نے خاتون کو تشدد کا نشانہ بنا ڈالا جس پر تھانہ ویمن فیصل آباد کی جانب سے متاثرہ خاتون خدیجہ کی مدعیت میں 6 نامزد اور 10 نامعلوم ملزمان پر مقدمہ درج کیا گیا۔

سائلہ کا کہنا تھا کہ ملزم نے اس کے گھر رشتہ بھیجا جس پر سائلہ کی جانب سے انکار کردیا گیا، انکار کرنے پر ملزم  کی جانب سے اسے فون پر دھمکیاں دی گئیں، سائلہ اور اس کے بھائی کو اغواء کرلیا گیا۔

واقعہ کا نوٹس لیتے ہوئے سی پی او عمر سعید کے حکم پر شہر کے ملزم  اور بیٹی سمیت 16 افراد کے خلاف مقدمہ درج کیا گیا، مقدمہ یونیورسٹی ٹاؤن کی رہائشی لڑکی کی درخواست پر تھانہ ویمن میں درج کیا گیا ہے-

ایف آئی آر کے مطابق مقدمہ میں 6 نامزد جبکہ 10 نامعلوم ملزمان شامل ہیں، ملزمان کی تلاش کے لئے چھاپے مار کر مرکزی ملزم سمیت 6 افراد کو گرفتار کر لیا گیا۔

یہ بھی پڑھیں:

اینیمل پورنو گرافی کیس میں بڑی پیش رفت،مدعیہ لڑکی گینگ کا حصہ قرار

متاثرہ لڑکی نے کہا کہ میرے سر کے بال اور بھنوئیں کاٹ ڈالیں اور جوتیاں چاٹنے پر مجبور کیا گیا، ملزم دانش نے جنسی ہراساں بھی کیا اور وڈیوز بنائیں اور وائرل کردیں، ملزمان نے تمام واقعہ کی ویڈیو بنا کر اور دھمکیاں دے کر چھوڑا۔

پولیس کا کہنا تھا کہ ملزمان کے خلاف سخت کارروائی جاری ہے اور معاملے کی مزید تحقیقات کی جارہی ہیں۔