دعا زہرہ کے والد کا عید کے موقع پر اپنی بیٹی کے لئے ویڈیو پیغام

کراچی: شہر قائد سے مبینہ طور پر پسند کی شادی کرکے لاہور فرار ہونے والی دعا زہرا کے والد مہدی کاظمی نے بیٹی کے لیے عید الاضحیٰ کے موقع پر خصوصی ویڈیو پیغام جاری کیا ہے۔

دعا زہرہ کے والد کا اپنے ویڈیو پیغام میں کہنا تھا کہ ‘بچیاں سب کی سانجھی ہوتی ہیں، اللہ تعالیٰ سے دعا کرتا ہوں کہ تمام ماں باپ کے ساتھ ان کی بچیوں کا ساتھ رہے، یہ دوسری عید ہے جب میری بیٹی دعا میرے پاس نہیں ہے، اللہ سے دعا ہے کہ یہ آخری عید ہو جب میری بیٹی میرے پاس نہیں ہے’۔

انہوں نے کہاکہ ‘آپ کی بہنیں آپ کا انتظار کررہی ہیں، آپ کی ماں آپ کے لیے آنسو بہاتی ہے، میں بھی بے صبری سے آپ کا انتظار کررہا ہوں ‘۔

اُن کا مزید کہنا تھا کہ ‘دعا ہے اللہ یہ دن جلدی گزار دے، آپ کو پہلے جتنا پیار اور محبت ملتی تھی اب اس سے کہیں زیادہ ملے گی، یہ ہمارا خلوص اور پیار ہی ہے جو آپ کے لیے اس حد تک کھڑے ہیں ‘۔

مزید پڑھیں:دعا زہرہ کا نکاح کیسے ہوا؟ ویڈیو منظرِ عام پر آگئی

مہدی کاظمی کا اپنی بیٹی کو مخاطب کرتے ہوئے کہنا تھا کہ ‘بیٹا آپ کے بغیر زندگی گزارنا ممکن نہیں ہے، ہم آپ سے بہت پیار کرتے ہیں، مجھے معلوم ہے آپ جو بھی بیانات دے رہی ہو وہ مجبوری میں دے رہی ہو، مجھے کوئی گلا شکوہ نہیں ہے’۔