منجمد اثاثوں کو بحال نہ کیا گیا توامریکا سے متعلق پالیسی پرنظرثانی کریں گے،افغان طالبان

افغانستان: طالبان نے امریکا کو خبردار کرتے ہوئے کہا ہے کہ اگر افغانستان کے اثاثے بحال نہیں کئے تو امریکا سے متعلق تمام پالیسیوں پر نظر ثانی کریں گے۔

افغان حکومت کے نائب ترجمان انعام اللہ سمنگانی نے کہا ہے کہ نائن الیون کے حملوں سے افغانستان کا کوئی تعلق نہیں تھا۔

اُن کا مزید کہنا تھا کہ امریکا اگر اپنے فیصلے سے پیچھے نہیں ہٹا اور ہمارے خلاف اشتعال انگیز کاروائیاں جاری رکھیں تو مجبوراً ہمیں امریکا سے متعلق اپنی پالیسی پر نظرثانی کرنا پڑے گی۔

دریں اثناء اُن کا مزید کہنا تھاکہ امریکا افغانستان کے اثاثے نائن الیون کے متاثرین میں تقسیم کرنے کا فیصلہ فوری واپس لے۔ افغانستان کی دولت غیرمشروط طور پرواپس کی جائے۔

واضح رہے کہ امریکی صدر جو بائیڈن نے ایک صدارتی حکم نامے پر دستخط کئے ہیں، جس میں یہ فیصلہ کیا ہے کہ افغانستان کے امریکا میں منجمد اثاثوں میں سے نصف نائن الیون متاثرین کو دیے جائینگے۔