ایف پی سی سی آئی کاصنعتی رئیل اسٹیٹ کی خرید و فروخت پر پابندی کا مطالبہ

کراچی:نائب صدر ایف پی سی سی آئی ناصر خان نے کہا ہے کہ نئی صنعتوں کا قیام اور موجودہ صنعتوں کی توسیع کے لیے مختص ایکسپورٹ پروسیسنگ زونز اور اسپیشل اکنامک زونز میں پاکستان بھر میں صنعتی رئیل اسٹیٹ میں غیر پیداواری قیاس آرائی جا ری ہے اور صنعتی تر قی میں ایک بہت بڑی رکاوٹ ہے۔

انہوں نے گورنر ہاؤس میں وفاقی وزیر صنعت و پیداوار مخدوم خسرو بختیار سے بھی ملا قات کی اور انکو تحریری طور پر اپنے تحفظات سے آگاہ کیا۔

ناصر خان نے مزید کہا کہ حکومت فوری مداخلت کرے اور منافع خوری کے لیے صنعتی رئیل اسٹیٹ کی خرید و فروخت پر پابندیاں عائد کرے اور اس بات کو یقینی بنائے کہ صنعتی پلاٹ صرف انڈسٹریز لگانے کے لیے مخصوص ہیں۔

مزید پڑھیں:سی این جی سیکٹر مشکلات سے دوچار،گیس بحران حکومت کی نااہلی ہے، شبیر سلیمان

ناصر خان نے اپنے گہرے عدم اطمینان کا اظہار کرتے ہو ئے کہاکہ پچھلے 20 سالوں کے دوران بلوچستان کے لیے ایکسپورٹ پروسیسنگ زونز اور اسپیشل اکنامک زونز کے اعلانات مختلف پے درپے حکومتوں کی جانب سے کیے گئے ہیں لیکن درحقیقت کو ئی ٹھوس مقاصد اب تک حاصل نہیں کیے جا سکے ہیں۔

انہوں نے کہا کہ وہ اس تاخیر کا ذمہ دار صرف موجودہ حکومت کو نہیں ٹھہراتے۔ناصر خان نے صنعتی زمین کی پروٹیکشن کے لیے ریگولیٹری اور قانونی طریقہ کار وضع کرنے کی بھی سفارش کی ہے اور متعین شرائط و ضوابط کے تحت حقیقی صنعتکاروں کو باقی ممالک کی طرح کم قیمتوں پر صنعتی پلاٹ مہیا کرنے کی بھی سفارش کی ہے۔

انہوں نے مزید کہا کہ مذکورہ اقدامات فارن ڈائریکٹ انوسمنٹ لا ئیں گے اور پاکستانی پرائیویٹ شعبے کے سرمایہ کاروں کو بھی راغب کریں گے اور اس کے نتیجے میں صنعتی تر قی، متبادل امپورٹ، معاشی ترقی اور روزگار کے مواقع پیدا ہوں گے۔