نوازشریف کو لندن روانگی کے لیے جہازپرچڑھتے دیکھا توحیران رہ گیا، وزیراعظم

میانوالی: وزیراعظم عمران خان نے کہا کہ نوازشریف کو لندن روانگی کے لیے جہاز پرچڑھتے دیکھا توحیران رہ گیا اورپھر ڈاکٹرز کی رپورٹ یاد آ گئی کہ یہ اتنی بیماریوں کے باوجود بھی یہ مریض ایک دم کیسے ٹھیک ہوگیا، نواز شریف کو لندن کی ہوا لگی یا صرف جہاز دیکھ کر ہی ٹھیک ہوگئے۔

وزیراعظم عمران خان کا میانوالی میں اسپتال کا سنگ بنیاد رکھنے کی تقریب سے خطاب کرتے ہوئے کہنا تھا کہ2018 کے بعد جب پاکستان ملا تو دو بڑے مسئلے تھے، ہمیں تاریخی خسارہ ملا، بجلی میں ساڑھے 1200 ارب کا گردشی خسارہ ملا، ن لیگ گیس میں 154 ارب روپے کا خسارہ چھوڑ کر گئی۔ کرنٹ اکاؤنٹ کا ساڑھے 19 ارب ڈالر کا خسارہ تھا۔

عمران خان نے کہا کہ ہم امپورٹ زیادہ کررہے تھے اورایکسپورٹ کم کررہے تھے جس کے باعث ہمارے روپے کی قدرگرتی گئی تاہم پچھلے 4 ماہ میں ہمارا خسارہ کم ہوا جس کے باعث روپے کی قدرمیں اضافہ ہوا، ہمارا راستہ اب ٹھیک ہوگیا۔

انہوں نے کہا کہ 23 سال قبل جب سیاست شروع کی تو احساس ہوا کہ لوگوں کو سب سے زیادہ مشکل اسی بات کی ہوتی ہے کہ جب وہ بیمار ہوں تو اسپتال اور ڈاکٹرز نہ ہوں، مریضوں کو علاج کے لیے میانوالی سے لاہور اور راولپنڈی جانا پڑتا تھا۔

وزیراعظم کا کہنا تھا کہ نوازشریف کی رپورٹ میں 15 بیماریاں بتائی گئی تھیں،جب نوازشریف کو لندن روانگی کے لیے جہازپرچڑھتے دیکھا توحیران رہ گیا کہ اتنی بیماریوں کے باوجود بھی یہ مریض ایک دم کیسے ٹھیک ہوگیا۔ اس مریض کی توکڈنی بھی خراب ہے، شوگر بھی بڑھی ہوئی ہے، نواز شریف کو لندن کی ہوا لگی یا صرف جہاز دیکھ کر ہی ٹھیک ہوگئے۔

وزیراعظم کاکہناتھا کہ جس جہاز میں نوازشریف لندن گئے کوئی عام آدمی نہیں جا سکتا۔ اسحاق ڈار کے والد کی سائیکلوں کی دکان تھی آج اس کے بیٹے ارب پتی ہیں۔ حسن نواز 8 ارب کے گھر میں رہتا ہے، ان کے پاس اتنا پیسا کہاں سے آیا۔ تبدیلی تب آئے گی جب اس مافیا کو شکست دیں گے۔ ان ڈاکووں کا مقابلہ کر کے دکھاؤں گا۔

ان کا کہنا تھا عمران خان کرسی بچانے کے لیے نہیں بلکہ تبدیلی لانے کیلئے آیا ہے اور ان کے خلاف کیسز ہم نے نہیں بنائے بلکہ پہلے کے بنے ہوئے ہیں، اگر اِن سے ڈیل کر لوں تو ملک سے غداری ہو گی، یہ چاہتے ہیں کہ پھر سے لوٹ مار کا نظام آجائے لیکن سب ڈاکوؤں کا اکیلے مقابلہ کروں گا۔

وزیر اعظم عمران خان نےکہا کہ دنیا میں جو کامیاب سسٹم ہے ہم وہ زبردست بلدیاتی نظام پاکستان میں لے کر آئیں گے، پاکستان میں کبھی بھی بلدیاتی نظام اچھا نہیں آیا، کبھی ایسا بلدیاتی نظام نہیں آیا جو کے پی، پنجاب میں لانے والے ہیں،ایک صوبے میں فنانس کمیشن اور فنانس ایوارڈ بنے گا، بلدیاتی نظام میں پیسا صوبوں کے ذریعے گاؤں میں منتقل ہوگا۔

انہوں نے کہا کہاب گاؤں میں الیکشن ہوں گے اور وہ خود فیصلہ کریں گے کہ پیسا کہاں خرچ کرنا ہے، گاؤں کے لوگ اپنے پرائمری سکول پر نظر رکھیں گے۔ چند ماہ میں بلدیاتی انتخابات ہونے والے ہیں، قانون بن چکا، ہم صوبوں سے اختیارات بلدیاتی سطح پرمنتقل کریں گے۔